Sun’iy intellekt (AI) texnologiyalarining tez rivojlanishi natijasida ilgari faqat nazariy tushuncha bo‘lgan AI “super agentlari”—murakkab vazifalarni mustaqil bajara oladigan ilg‘or tizimlar, endilikda amaliyotda qo‘llanila boshladi. Biroq shunday savol tug‘iladi: mavjud texnologik infratuzilmalar bunday kuchli tizimlarni qo‘llab-quvvatlashga tayyormi?
AI super agentlarining rivojlanishi
AI super agentlar an’anaviy chatbotlardan tubdan farq qiladi. Oldingi chatbotlar belgilangan ssenariylarga asoslangan bo‘lsa, AI super agentlari o‘z qarorlarini mustaqil ravishda shakllantirib, muhitga moslasha oladi. Ular nafaqat oldindan yozilgan ma’lumotlarni ishlatadi, balki yangiliklarni o‘rganib, o‘z tajribasidan kelib chiqib harakat qiladi. Shu xususiyatlari ularni moliya, sog‘liqni saqlash va mijozlarga xizmat ko‘rsatish kabi sohalar uchun nihoyatda foydali vositaga aylantiradi.
Bunga yaqqol misol sifatida OpenAI’ning ChatGPT Pro xizmatini keltirish mumkin. Bu xizmat o1 modeliga asoslangan bo‘lib, foydalanuvchilar uchun yiliga o‘rtacha 9,4 million token ishlab chiqaradi. Kelgusida OpenAI yanada kuchli AI agent xizmatlarini ishga tushirishni rejalashtirmoqda, ularning obuna narxi oyiga $2,000 dan $20,000 gacha bo‘lishi mumkin. Ushbu “super agentlar” har bir foydalanuvchiga yiliga 36 milliondan 356 milliongacha token ishlab chiqarishi mumkin, bu esa ularning kuchli hisoblash quvvatiga ehtiyoj borligini bildiradi.
Hisoblashdagi qiyinchiliklar va sanoatga ta’siri
AI super agentlarni ishga tushirish ulkan hisoblash resurslarini talab qiladi. Ularning har bir fikrlash jarayoni uchun yangi tokenlar hosil qilinishi kerak bo‘ladi, bu esa AI serverlari va grafik protsessorlar (GPU) kabi maxsus uskunalar orqali amalga oshiriladi. Barclays tahlilchilari hisob -kitoblariga ko‘ra super agentlar oddiy chatbot mahsulotlariga nisbatan 25 barobar ko‘proq token ishlab chiqarishi mumkin. Bu esa hisoblash infratuzilmasiga bo ‘lgan talabni sezilarli darajada oshiradi.
Bunday o‘sish jiddiy muammolarni yuzga keltiradi: mavjud hisoblash infratuzilmasi AI super agentlarning ortib borayotgan ehtiyojlarini qondira olmasligi mumkin. Bunga javoban, OpenAI kabi yetakchi kompaniyalar muammoni hal etish uchun faol choralar ko‘rmoqda. SoftBank hamkorligida OpenAI Stargate loyihasi ishga tushirildi. Ushbu loyihaga $500 milliard dollar ajratilgan bo‘lib, keyingi to‘rt yil davomida ilg‘or AI infratuzilmasini yaratishga qaratilgan.
DeepSeek’ning paydo bo‘lishi va uning buzuvchi ta’siri
AI sanoatidagi bu o‘zgarishlar fonida, Xitoyning DeepSeek nomli startapi paydo bo‘ldi va ushbu kompaniya OpenAI kabi yirik texnologik gigantlarga raqobatchi bo ‘lish maqsadida sun’iy intellekt modellarini yaratishga kirishdi. Ajablanarlisi shundaki, DeepSeek o‘z modellarini eskirgan Nvidia chiplarida va ancha kam hisoblash quvvatida ishlab chiqdi. Bu esa ilg‘or AI tizimlari faqat katta hisoblash resurslarini talab qiladi degan umumiy qarashni shubha ostiga oldi.
DeepSeek’ning bu yutuqlari AI sanoatida katta silkinish yaratdi va hisoblash strategiyalarini qayta ko‘rib chiqishga undadi. Masalan, DeepSeek’ning arzon va samarali modellari bilan bog‘liq xavotirlar tufayli Nvidia aksiyalari qiymati qariyb 18% ga tushdi. Bu esa AI bozorining qanday tez o‘zgarayotganini va mavjud kompaniyalar uchun doimiy innovatsiya va moslashuv zarurligini yana bir bor ko‘rsatdi.
Strategik javoblar va kelajakdagi istiqbollar
Ushbu muammolar va kuchayib borayotgan raqobat fonida, soha yetakchilari strategik choralarni qo‘llay boshlashdi. OpenAI bosh direktori Sem Altman kompaniyaning yangi va kuchliroq bo‘lgan AI modellarini tezlashtirilgan tarzda taqdim etish rejasini e’lon qildi. Bu tashabbus OpenAI’ning raqobatdagi ustunligini saqlab qolish va murakkab AI imkoniyatlariga bo‘lgan talabni qondirishni maqsad qilgan edi.
Shuningdek, kompaniyalar o‘zlarining hisoblash imkoniyatlarini kuchaytirish uchun hamkorliklar va sarmoyalarni o‘rganmoqda. OpenAI’ning sun’iy intellektga ixtisoslashgan bulutli xizmat provayderi CoreWeave bilan hamkorligi bu tendensiyaning yaqqol namunasi hisoblanadi. $11,9 milliardlik kelishuv orqali OpenAI CoreWeave’ning keng ko‘lamli AI infratuzilmasiga, jumladan chorak milliondan ortiq Nvidia GPUlariga kirish imkoniyatiga ega bo‘ladi va bu kompaniyaning ulkan sun’iy intellekt loyihalarini qo‘llab-quvvatlash uchun xizmat qiladi.
Xulosa
AI super agentlarining paydo bo‘lishi texnologiya sohasida inqilobiy davrni boshlab berdi va turli yo‘nalishlarda misli ko‘rilmagan imkoniyatlarni taqdim etmoqda. Biroq, bu imkoniyatlarni to‘liq ro‘yobga chiqarish uchun ulkan hisoblash resurslariga bo‘lgan ehtiyoj hal qilinishi lozim. Sanoat bu murakkab manzarada harakat qilar ekan, infratuzilmaga strategik sarmoyalar, hamkorlikdagi tashabbuslar va uzluksiz innovatsiyalar AI super agentlarining kelajakdagi yo‘nalishi hamda jamiyatdagi integratsiyasini belgilovchi asosiy omillarga aylanadi.
Tayyorladi: Navro‘zaxon Bo‘riyeva
Fikr bildirish