Xitoy avtomobil sanoati chiplari ishlab chiqarishda mahalliy mahsulotlar ulushi 1%dan kamni tashkil qiladi. Elektron quvvat tizimlari va xotira mikrosxemalari sohasida esa bu ko’rsatkich atigi 8%ni tashkil etadi. O‘tgan yil bahorida Xitoy hukumatining qarori bilan mahalliy ishlab chiqarilgan chiplardan foydalanish ulushini joriy yil oxirigacha 25%gacha oshirish maqsadi qo‘yilgan.
Xitoyda elektromobillar ishlab chiqarish hajmi tez sur’atlar bilan oshmoqda, bu esa chiplarga bo‘lgan ehtiyojni yanada kuchaytiradi. Agar an’anaviy ichki yonuv dvigatelli avtomobillarda har bir avtomobilga 600-700 ta chip zarur bo‘lsa, elektromobillarda bu ko‘rsatkich 1600 tagacha oshadi. Avtopilot kabi funksiyalar bu raqamni 3000 tagacha yetkazadi. O‘tgan yilning dastlabki 11 oyida Xitoyda 11,49 millionta elektromobil ishlab chiqarilgan bo‘lib, bu o‘tgan yilning shu davriga nisbatan 37,5% ko‘pdir. Elektromobillar barcha yengil avtomobillarning 40,8%ini tashkil qilgan.
Shuningdek, chiplarning avtomobil tannarxidagi ulushi ham oshmoqda. 2019-yilda ular avtomobil narxining 4%ini tashkil etgan bo‘lsa, 2030-yilga kelib bu ko‘rsatkich 20%gacha ko‘tarilishi mumkin. Shunga qaramay, Xitoy hududida ishlab chiqarilayotgan avtomobil chiplari asosan Infineon, NXP, STMicroelectronics, Texas Instruments va Renesas Electronics kabi xorijiy kompaniyalar tomonidan ishlab chiqarilmoqda. Transport vositalarini boshqarishda foydalaniladigan ilg‘or elektronika bozorida xorijiy kompaniyalar ulushi yanada yuqori. Nvidia Orin X va Tesla FSD protsessorlari o‘tgan yilning yanvar-sentyabr oylarida bozorning mos ravishda 37,8% va 26,7%ini egallagan. Qualcomm esa avtomobil ichki multimedia tizimlari uchun chiplarda deyarli to‘liq hukmronlik qilmoqda. Dekabr boshida Xitoy hukumati mahalliy avtomobil ishlab chiqaruvchilarni AQSh chiplari ustidan haddan tashqari qaramlik xavfi haqida ogohlantirgan.
Mahalliy chip ishlab chiqaruvchilar asosan analog yechimlar, quvvat tizimlari va ayrim turdagi sensorlarni taklif qilishga qodir. Ammo ilg‘or elektronika ishlab chiqarishni yo‘lga qo‘yish sanksiyalar sharoitida qiyinlashmoqda. Shunday bo‘lsa-da, Nio va XPeng kompaniyalari avtopilot uchun o‘z protsessorlarini ishlab chiqishni yakunlaganini e’lon qilishgan. Kelajakda butun Xitoy avtomobil sanoati uchun yagona standart asosida ishlaydigan yechimlar ishlab chiqish foydali bo‘lardi, chunki standartlashtirish va katta hajmdagi ishlab chiqarish ushbu komponentlarni ishlab chiqarish va xarid qilish xarajatlarini kamaytiradi.
Fikr bildirish