Alif Group xalqaro moliya bozorida muvaffaqiyatli kelishuv imzolab, Islom Taraqqiyot Banki guruhining a’zosi bo‘lgan Xalqaro Islom Savdo Moliya Korporatsiyasidan (ITFC) O‘zbekistondagi fintech xizmatlari, xususan, Nasiya to‘lov xizmatini rivojlantirish uchun 3 million AQSh dollari miqdorida mablag‘ jalb qildi.
Kelishuv ITFC va Ipak Yo‘li banki o‘rtasidagi hamkorlik doirasida amalga oshirilib, O‘zbekistondagi xususiy sektorga qo‘llab-quvvatlash ko‘rsatishni maqsad qilgan. Mazkur mablag‘ mashhur Nasiya xizmatini yanada takomillashtirishga yo‘naltiriladi.
Mazkur bitim jarayonida Alif’ga Ansher Capital va TMT Global Advisors investitsiya firmalari maslahat xizmatlarini ko‘rsatdi. Alif O‘zbekiston bosh direktori Nuriddin Lafizov ushbu hamkorlikning ahamiyatini ta’kidlab, bu bitim fintech xizmatlariga kengroq kirish imkoniyatlarini yaratishi va kompaniyaning bozor o‘rnini mustahkamlashga xizmat qilishini aytdi.
“Ushbu hamkorlik bizning uzoq muddatli strategiyamiz – xorijiy investitsiyalarni jalb qilish va innovatsion moliyaviy mahsulotlarni rivojlantirish yo‘lida yana bir muhim qadamdir. Shuningdek, xalqaro bozorda islomiy sukuk obligatsiyalarini chiqarishni rejalashtiryapmiz, bu mablag‘lar O‘zbekistonda iste’molchilarni moliyalashtirishga yo‘naltiriladi,” — deya qo‘shimcha qildi Lafizov. Obligatsiyalar xalqaro Euroclear depozitarida ro‘yxatdan o‘tkaziladi.
Bundan avval, 2024-yil dekabr oyida Alif O‘zbekiston Nasiya xizmatini kengaytirish maqsadida AQShning Accial Capital investitsiya firmasidan 20 million AQSh dollari miqdorida moliyaviy mablag‘ jalb qilgan edi. Ushbu kelishuvda ham TMT Global Advisors maslahat xizmatlarini ko‘rsatgan.
2024-yilda Alif O‘zbekiston umumiy qiymati 50 million AQSh dollarini tashkil etuvchi xorijiy investitsiyalarni jalb qilib, mahalliy bo‘linmasi uchun umumiy investitsiya miqdorini 150 million AQSh dollaridan oshirdi. Bu kompaniyaning jadal o‘sishi va xalqaro investorlar uchun jozibadorligini ko‘rsatadi.
