Apple 2025-yil sentabr oyida o‘zining yangi iPhone 17 turkumini taqdim etdi: iPhone 17, 17 Pro, 17 Pro Max va yupqaroq versiya – iPhone Air. “Air” brendi MacBook Air va iPad Air’ni eslatadi, shu bilan birga smartfon ishlab chiqaruvchilar eng yupqa telefonlar ortidan quvgan davrni ham yodga soladi. Ammo bugungi kunda telefonning qalinligi emas, unda ishlatiladigan dasturiy ta’minotning imkoniyatlari muhimroq.
Shu jihatdan qaraganda, Apple biroz ortda qolmoqda. Tadbir davomida kompaniya AI haqida juda kam gapirdi. Asosan, iyun oyidagi WWDC’da e’lon qilingan Visual Intelligence va on-device modellar qayta eslatildi. Kamera imkoniyatlari orasida esa Center Stage funksiyasi tilga olindi. Eng jozibador AI yangilik esa iPhone’ga emas, balki AirPods 3 qurilmasiga qo‘shilgan jonli tarjima xizmati bo‘ldi. Siri haqida esa hech qanday yangilik berilmadi.
Google o‘tgan oy Pixel 10 smartfonini AI’ga asoslangan yordamchi bilan taqdim etgan bo‘lsa, iPhone foydalanuvchilari hali ham AI Siri’ni 2026-yilgacha kutishlari kerak bo‘ladi. Hozircha Apple qurilmalari faqat oddiyroq AI xususiyatlarini, masalan, matn yozish vositalari, qisqartirish, generativ rasm yaratish, tarjima va vizual qidiruv kabi funksiyalarni taklif etmoqda.
Uchinchi tomon bilan hamkorlik – xavfmi yoki imkoniyat?
So‘nggi xabarlarga ko‘ra, Apple uchinchi tomon texnologiyalaridan foydalanishni rejalashtirmoqda. Bu esa Google Gemini yoki boshqa kompaniya yechimlari Siri’ning asosida ishlashi mumkinligini anglatadi. Bir qarashda, bu Apple uchun salbiy tuyulishi mumkin. Lekin aslida, foydalanuvchilar uchun bu katta ustunlik bo‘lishi ehtimoldan xoli emas.
Bugun ko‘plab iPhone egalari Apple ilovalari o‘rniga Gmail, Google Drive, Google Maps yoki Chrome’dan foydalanadi. Nega endi ular Apple qurilmasida Google’ning AI xizmatidan ham foydalanmasin? Agar Apple bunday hamkorlikni yo‘lga qo‘ysa, yuqori darajadagi AI texnologiyasi iPhone ichiga bevosita integratsiya qilinadi va foydalanuvchilar uchun yanada tabiiy tajribani taqdim etadi.
Bundan tashqari, Apple katta infratuzilma xarajatlarisiz bozordagi tezkor AI raqobatiga moslasha oladi. Eng muhimi, bu yechim kompaniyaga moslashuvchanlik beradi – kelajakda istalgan modelni almashtirish yoki kengaytirish imkoniyati paydo bo‘ladi.
Apple’ning asosiy ustunligi – dizayn va sifat
Apple o‘zining eng katta kuchini yo‘qotmaydi: dizayn, kamera sifatini oshirish, xavfsizlik va maxfiylikka e’tibor, hamda mukammal qurilish sifati. Demak, Apple hali ham “AI kompaniyasi” emas, balki eng avvalo “eng yaxshi qurilma ishlab chiqaruvchisi” sifatida qabul qilinadi.
Natijada, foydalanuvchilar yangi iPhone’larni xarid qilishda hamon Apple apparat sifati va dizayniga ishonadi, shu bilan birga zamonaviy AI imkoniyatlaridan ham bevosita foydalanishadi. Bu esa Apple uchun ham, mijozlar uchun ham yutqazmaydigan vaziyat bo‘lib chiqadi.
Manba
