Jovan Jonson — CPA va CFP sertifikatlariga ega bo‘lgan, Piece of Wealth Planning kompaniyasining hammuassisi. U strategik soliq rejalashtiruvi, shaxsiy moliyaviy boshqaruv hamda kichik biznes buxgalteriyasi sohasida chuqur tajribaga ega mutaxassis sanaladi. O‘n yildan ortiq faoliyati davomida u yuqori daromadli mutaxassislar va tadbirkorlar bilan ishlagan. Jonson muvaffaqiyatga erishgan mijozlarini tahlil qilar ekan, ularning ba’zilarida takrorlanuvchi fikrlash tarzi, odatlar va strategiyalar mavjudligini aniqlagan. Ajablanarlisi shundaki, bu sirlar faqat milliarderlar yoki moliyaviy elitalar uchun emas — ular har bir inson tomonidan o‘rganilib, hayotga tadbiq etilishi mumkin.
1. Saxiylik – uzoq muddatli foyda garovi
Jonson bilan ishlagan eng boy mijozlar odatda nafaqat pulda, balki vaqt, maslahat va imkoniyatlarda ham saxiy bo‘ladi. Kim boshqalarga — xodimlari, oilasi yoki jamoasiga — sarmoya kiritar ekan, bu nafaqat moliyaviy daromad, balki undan ham kattaroq foyda keltiradi.
Masalan, jamoasini faol qo‘llab-quvvatlagan rahbarlar ko‘pincha barqarorlik, kam xodim almashinuvi va samimiy ish muhitiga ega bo‘ladi. Bu — mehnat orqaligina erishib bo‘lmaydigan, qalb bilan barpo etiladigan boylikdir.
2. Boylik yolg‘iz qurilmaydi
Boy mijozlar orasida yana bir umumiy xususiyat — boshqalarga suyanishni bilish. Ular band va talabchan hayot tarzida yashaganlari uchun, topshiriqlarni boshqalarga topshirish tanlov emas, zarurat ekanini tushunadilar.
Ular moliyaviy maslahatchilar, buxgalterlar, parvarishchilar yoki shaxsiy yordamchilarni yollab, o‘z kuchlarini faqat eng samarali yo‘nalishlarga safarbar qiladi. Bu — vaqtni tejash, sifatni oshirish va katta maqsadlar sari qat’iy intilish uchun muhim strategiyadir.
3. Sog‘liq — muhokama qilinmaydigan ustuvorlikdir
Boylikning o‘zi yetarli emas, agar undan bahramand bo‘lishga jismoniy va ruhiy quvvat yetmasa. Ko‘plab boy insonlar — ba’zida og‘ir tajriba orqali — charchoq, stress yoki sog‘liqdagi muammolar orzularni izdan chiqarishi mumkinligini tushunib yetgan.
Shuning uchun ular sog‘liqni doimiy ustuvorlik sifatida ko‘rishadi. Kimdir muntazam mashq qiladi, boshqasi psixoterapiyaga qatnaydi yoki shunchaki dam olish uchun vaqtni tejaydi — barchasi farovonlikni uzoq muddatli sarmoya sifatida ko‘rishadi. Chunki ular biladi: yetakchilik qilish, rivojlanish va o‘sish faqat sog‘lom tanada bo‘ladi.
4. Umrbod o‘rganish — raqobatdagi ustunlikdir
Jonson kuzatgan eng boy mijozlar bir jihat bilan ajralib turadi: ular hech qachon o‘rganishni to‘xtatmaydi. Ular yangi bilimga chanqoq, har doim savollar beradi, yangi tendensiyalarni kuzatadi va o‘z ustida ishlaydi. Kimdir executive coaching’ga mablag‘ ajratadi, yana kimdir mastermind guruhlarda ishtirok etadi yoki har oy yangi kitoblar bilan tanishadi.
Ularda doimiy o‘sishga intilish, yangilikka ochiqlik mavjud — bu esa ularni raqobatda har doim oldinda ushlab turadi.
5. Intizom daromaddan muhimroq
Daromad oshishi boylik ortishini kafolatlamaydi. Eng barqaror boy mijozlar orasida “hayot tarzi inflatsiyasi”ga qarshi tura oladiganlar ko‘p. Ya’ni, ular har safar ko‘proq pul ishlaganida darrov ko‘proq sarflashga o‘tmaydi — aksincha, uzoq muddatli maqsadlarga e’tibor qaratadi.
Bu, masalan, ijaraga beriladigan mulklarga sarmoya kiritish, kelajakdagi loyihalar uchun jamg‘arish yoki kuchli investitsiya portfeli yaratish bo‘lishi mumkin. Ular hashamatga qiziqish paydo bo‘lganda ham intizomni saqlaydi, chunki haqiqiy boylik oylik maoshlarda emas, yillar davomida ongli tarzda quriladigan moliyaviy asosda yotadi.
6. Egalik — haqiqiy boylik manbai
Eng muhim saboq shundaki: moliyaviy erkinlik siz qancha topganingizdan emas, nimalarga egalik qilganingizdan kelib chiqadi. Yuqori maosh qulaylik yaratadi, ammo o‘zi bilan barqaror boylik olib kelmaydi.
Haqiqiy boylar e’tiborni daromad keltiruvchi aktivlarga egalik qilishga qaratadi — ya’ni, ular uxlayotgan paytda ham pul ishlaydigan aktivlar. Bunga aksiyalar, ijaraga beriladigan ko‘chmas mulk yoki boshqalar boshqaradigan bizneslar kiradi.
Egalik orqali ular o‘zlari ishlamayotgan vaqtda ham o‘sishda davom etadigan moliyaviy poydevor yaratadi.
Tayyorladi: Navro‘zaxon Bo‘riyeva
Fikr bildirish