B2B moliyaviy texnologiyalar sohasida faoliyat yurituvchi Comfi platformasi Pre-Series A bosqichida jami 65 million dollar miqdorida investitsiya jalb qilganini rasman e’lon qildi. Ushbu mablag‘ sarmoyaviy kapital (equity) va kredit liniyalaridan iborat bo‘lib, unda Iliad Partners yetakchiligidagi xalqaro investorlar, jumladan, Yango Ventures va Raw Ventures kabi nufuzli fondlar ishtirok etdi.
2023-yilda BAAda Sanjar Samiyev, Alisher Akbarov, Amal Abdullayev va Denis Gavrilin tomonidan tashkil etilgan mazkur startap qisqa vaqt ichida Yaqin Sharq va Shimoliy Afrika (MENA) mintaqasidagi kichik va o‘rta biznes subyektlarining eng og‘riqli muammolaridan biri — pul aylanmasi tanqisligiga yechim topishga muvaffaq bo‘ldi. Comfi tomonidan joriy etilgan «B2B Buy Now Pay Later» modeli mahsulot yetkazib beruvchilarga o‘z mablag‘larini 24 soat ichida naqdlashtirish imkonini bersa, xaridorlarga to‘lovni 90 kungacha kechiktirish imtiyozini taqdim etadi.
Kompaniya asoschisi va bosh direktori Sanjar Samiyevning ta’kidlashicha, an’anaviy bank tizimidagi murakkab to‘siqlar o‘rniga sun’iy intellektga asoslangan risklarni baholash tizimi (underwriting) tadbirkorlarga kapitaldan tezkor foydalanish imkonini beradi. Bugungi kunga qadar 15,000 dan ortiq hisob-fakturalarni muvaffaqiyatli qayta ishlagan platforma 1,000 dan ziyod mijozga xizmat ko‘rsatib kelmoqda.
Jalb qilingan yangi kapital Comfi’ning texnologik infratuzilmasini takomillashtirish, mahsulotlar qatorini kengaytirish va mintaqaviy strategik hamkorliklarni mustahkamlashga yo‘naltiriladi. Mazkur muvaffaqiyat O‘zbekistonlik mutaxassislarning global fintex bozorida raqobatbardosh ekanligining navbatdagi yaqqol isbotidir.
