Onlayn muloqot dunyosini tubdan o‘zgartirgan Discord endi 10 yillik faoliyatini ortda qoldirib, IPO (birja orqali ochiq kompaniyaga aylanish) sari yo‘l olmoqda. Dastlab o‘yinchilar uchun ochilgan bu platforma bugungi kunda AI loyihalaridan tortib maktab klublarigacha bo‘lgan turli guruhlar uchun asosiy suhbat maydoniga aylangan.
Ammo bu muvaffaqiyat ortida muammo ham yashiringan: real vaqtli suhbatlar ortiqcha xabarlarga to‘lib ketadi, foydali ma’lumotlar esa ko‘rinmay qoladi. An’anaviy forumlar esa bu borada ko‘proq tartib va tuzilmani taklif qiladi.
Discord nima qilmoqchi?
The Verge nashriga ko‘ra, Discord mahsulot bo‘yicha katta vitse-prezidenti Piter Sellis ushbu muammoni tan olib, platformaga ko‘proq “tuzilmali bilim almashinuvi” imkonini beruvchi vositalar qo‘shmoqchi ekanini aytdi. Yana bir g‘oya esa: AI yordamida uzoq va chalkash suhbatlarni qisqacha xulosaga aylantirish.
Sellis bu haqida shunday deydi:
- “Uzoq suhbatlardan vebda ulashish mumkin bo‘lgan sharhlarga aylantira oladigan texnologiya ustida ishlayapmiz. Ammo hali bizni to‘liq qoniqtiradigan yechim yo‘q.”
AI texnologiyalari, ayniqsa katta til modellari (LLM), bu muammoni hal qilishi mumkin. Lekin foydalanuvchilarning AI’ga bo‘lgan munosabati turlicha: kimdadir hayrat, boshqalarda esa xavotir uyg‘otadi.
Yangi bosh direktor, IPO va katta o‘zgarishlar fonida, Discord foydalanuvchilar uchun yangi interfeys va funksiyalar olib kelishi kutilmoqda.
