Asosiy jihatlar
Sobiq prezident Donald Trampning X (ilgari Twitter) platformasiga qarshi bergan da’vosi hal qilinadi, deb xabar bermoqda The Wall Street Journal. Ilon Maskga tegishli platforma ushbu 2021-yilda boshlangan senzura da’vosini hal qilish uchun $10 million to‘lashga rozi bo‘ldi.
X ushbu mablag‘ni to‘lashga kelishib oldi, garchi 2021-yilda Trampning akkaunti bloklanganida platformani Jek Dorsi boshqargan bo‘lsa ham. O‘sha paytda Twitter Trampning 6-yanvar Kapitoliy bosqiniga oid postlari zo‘ravonlikni ulug‘lash siyosatiga zid ekanini aytib, uning akkauntini bloklagan edi.
Tramp to‘rt yil oldin Twitter, Facebook va Google kompaniyalarini sudga bergan bo‘lib, ularni Kapitoliy hujumiga oid postlari sababli uni senzura qilishda ayblagan.
Manbalarga ko‘ra, Trampning advokatlari Maskning Trampga nisbatan do‘stona munosabatda ekanligini inobatga olib, da’voni bekor qilishni o‘ylashgan. The Wall Street Journal xabariga ko‘ra, Mask 2024-yilgi prezidentlik saylovlari oldidan Trampning saylov kampaniyasiga $200 milliondan ortiq mablag‘ sarflagan.
X platformasi hozircha Forbesning sharh so‘roviga javob bermadi.
Tramp Twitter’dan nima uchun bloklangandi?
Twitter Trampning ikki tvitini bloklashga asos sifatida ko‘rsatdi. Birinchi tvitda u “Amerikalik vatanparvarlar” hech qachon hurmatsiz qilinmasligi yoki adolatsiz munosabatda bo‘lishlarini qabul qilmasligini yozgan edi. Ikkinchi tvit esa uning prezident Jo Baydenning inauguratsiyasida qatnashmasligini bildirgan edi. Twitter ushbu postlar 6-yanvar isyonchilari uchun qo‘llab-quvvatlov sifatida talqin qilinishi va inauguratsiya oldidan zo‘ravonlikni rag‘batlantirishi mumkin deb hisoblagan.
Noma’lum jihatlar
Hozircha ushbu $10 million mablag‘ qayerga yo‘naltirilishi aniq emas. O‘tgan oy Meta (Facebook va Instagram’ning egasi) Tramp bilan shunga o‘xshash da’vo bo‘yicha kelishuvga erishib, $25 million to‘lashga rozi bo‘lgandi. The Wall Street Journal ma’lumotiga ko‘ra, ushbu mablag‘ning asosiy qismi Trampning prezidentlik kutubxonasiga yo‘naltirilishi mumkin.
Orqa fon
X ning bu kelishuvi Meta’ning Trampning senzura da’vosiga oid $25 millionlik shartnomasi ortidan kelmoqda. 6-yanvar voqealaridan so‘ng Meta Trampning Facebook va Instagram’dagi akkauntlarini ham bloklagandi. O‘sha paytda kompaniya rahbari Mark Sukerberg Tramp o‘z platformasidan “tarafdorlari harakatlarini qoralash o‘rniga ularni qo‘llab-quvvatlash uchun foydalangan” deb bayonot bergan edi. Biroq, hozirda Trampning barcha ijtimoiy tarmoqlardagi akkauntlari tiklangan.
Mask va Tsukerberg so‘nggi vaqtlarda Trampga yaqinlashgan. Mask saylovdan oldin Trampni qo‘llab-quvvatlagan va hozirda uning ma’muriyatida Davlat Samaradorligi Departamenti rahbari sifatida faoliyat yuritmoqda. Ushbu departament davlat agentliklarini qisqartirish va federal byurokratiyani kamaytirish bilan shug‘ullanmoqda.
Sukerberg esa saylovdan oldin Trampni rasman qo‘llab-quvvatlamagan bo‘lsa-da, Meta Trampning inauguratsion jamg‘armasiga $1 million xayriya qilgan. O‘tgan yili Trampga qilingan suiqasd urinishi ortidan Sukerberg uni “badass” (jasur) deb ta’riflagandi.
Yanvar oyida bo‘lib o‘tgan Trampning inauguratsiyasida Mask va Sukerberg yetakchi texnologiya kompaniyalari rahbarlari qatorida old qatorlarda o‘tirishgan edi.
Fikr bildirish