Enterprise Uzbekistan Xalqaro raqamli texnologiyalar markazi boshqaruv raisi lavozimiga Farhod Ibragimov tayinlandi.
Korporativ axborot yagona portalida e’lon qilingan ma’lumotga ko‘ra, markaz boshqaruv tarkibi 2026-yil 2-sentabr kuni tasdiqlandi. Markazning sobiq rahbari Amir Mardiyev maxsus huquqiy rejim bo‘yicha boshqaruv raisining o‘rinbosari etib belgilandi. Shuningdek, yangi boshqaruv tarkibiga Elyor Maqsudov (ishtirokchilar bilan ishlash bo‘yicha o‘rinbosar), Bahodir Ayupov (xalqaro biznesni rivojlantirish bo‘yicha o‘rinbosar) va Sardorjon Ahmedov (operatsion boshqaruv bo‘yicha o‘rinbosar) kiritildi.
Farhod Ibragimov ushbu tayinlovga qadar — 2025-yil fevral oyidan buyon IT Park Uzbekistan Kuzatuv kengashi raisi sifatida faoliyat yuritib, ekotizimni strategik rivojlantirish va Enterprise Uzbekistan’ni tashkil etish jarayonlariga rahbarlik qilgan. U bundan avval, 2017-yil noyabr oyidan boshlab texnoparkni (dastlab Mirzo Ulug‘bek nomidagi Innovatsiya markazi) boshqarib kelgan edi.
Enterprise Uzbekistan xalqaro markazi o‘zining huquqiy maqomiga 2026-yil 20-avgustda, O‘zbekiston Respublikasi Prezidenti tegishli konstitutsiyaviy qonunni imzolagach ega bo‘ldi. Markazni tashkil etish bo‘yicha tayyorgarlik ishlari 2025-yil noyabrdagi farmonga muvofiq Tashkent shahridagi IT Park bazasida boshlangan edi. Prezident tomonidan tasdiqlangan konsepsiyaga ko‘ra, markazda 2100-yilgacha amal qiluvchi maxsus huquqiy rejim joriy etiladi. Bu rejim ingliz huquqi tamoyillari hamda tartibga solish «qumdoni» (regulatory sandbox) mexanizmlarini o‘z ichiga oladi.
Ushbu loyiha bank va moliya sohasiga ixtisoslashgan Toshkent xalqaro moliya markazi bilan bir qatorda mamlakatdagi ikkita maxsus yurisdiksiyadan biriga aylanadi. Har ikkala markaz faoliyati 2027-yilda yo‘lga qo‘yilishi va u orqali 20 milliarddan 25 milliard AQSh dollarigacha bo‘lgan investitsiyalarni jalb etish rejalashtirilgan.
Enterprise Uzbekistan faoliyati bevosita O‘zbekiston Respublikasi Prezidenti raislik qiladigan maxsus Kengash tomonidan boshqariladi. Kengash tarkibidan Bosh vazir Abdulla Aripov, Bosh vazir o‘rinbosari – iqtisodiyot va moliya vaziri Jamshid Qo‘chqorov, raqamli texnologiyalar vaziri Sherzod Shermatov, adliya vaziri Akbar Toshqulov, Markaziy bank raisi Timur Ishmetov, Istiqbolli loyihalar milliy agentligi direktori Dmitriy Li hamda Prezident administratsiyasining Moliya texnologiyalari, raqamlashtirish va sun’iy intellekt departamenti rahbari Bobur Xodjayev joy olgan.
