Google DeepMind robototexnika uchun mo‘ljallangan yangi avlod sun’iy intellekt tizimi — Gemini Robotics 2‘ni taqdim etdi. Kompaniya yangi model robotlarga nafaqat buyruqlarni tushunish, balki murakkab jismoniy harakatlarni bajarish, bir necha daqiqalik vazifalarni rejalashtirish va boshqa robotlar bilan hamkorlik qilish imkonini berishini ma’lum qildi.
Yangi tizim uchta asosiy modeldan iborat:
- Gemini Robotics 2 — ko‘rish, til va harakat (Vision-Language-Action) modelini birlashtirib, humanoid robotning butun tanasini boshqaradi.
- Gemini Robotics ER 2 — bir necha bosqichli murakkab vazifalarni rejalashtiruvchi va nazorat qiluvchi «reasoning» agent.
- Gemini Robotics On-Device 2 — internetga ulanmasdan ishlaydi va yangi robot platformalariga bir necha soat ichida moslasha oladi.
Avvalgi avlod asosan robotlarning qo‘l va yuqori tana harakatlariga qaratilgan bo‘lsa, Gemini Robotics 2 endi robotlarga yurish, egilish, cho‘kkalash, buyumlarni ko‘tarish va joylashtirish kabi to‘liq tana harakatlarini bajarish imkonini beradi. Google namoyishlarida Apptronik kompaniyasining Apollo 2 humanoid roboti tabiiy til orqali berilgan topshiriqlarni mustaqil bajargan.
Kompaniya modelning mayda motorika bo‘yicha ham sezilarli yutuqlarga erishganini ta’kidlamoqda. Robotlar besh barmoqli manipulyatorlar yordamida paketlarni yopish, tugun bog‘lash, lampochkani burab chiqarish kabi murakkab vazifalarni bajara oladi. Shuningdek, tizim ikki barmoqli sanoat gripperlari bilan ham ishlashga moslashtirilgan.
Gemini Robotics ER 2 esa robotlarga bir necha daqiqa davom etadigan murakkab topshiriqlarni bosqichma-bosqich bajarish, xatolarni aniqlash va zarur hollarda rejani o‘zgartirish imkonini beradi. Bundan tashqari, model bir nechta robot o‘rtasida vazifalarni taqsimlab, jamoaviy ishlashni ham qo‘llab-quvvatlaydi.
Google xavfsizlik masalasiga ham alohida e’tibor qaratgan. Tizim insonlarning yaqinligini aniqlashi, xavfli buyruqlarni rad etishi yoki noaniq vaziyatlarda inson yordamiga murojaat qilishi mumkin.
Google DeepMind’ning maqsadi alohida robotlar uchun alohida sun’iy intellekt yaratish emas, balki turli robot platformalarida ishlay oladigan universal «miya»ni yaratishdir. Agar loyiha muvaffaqiyatli amalga oshsa, Gemini kelajakda humanoid robotlar, sanoat manipulyatorlari va servis robotlari uchun umumiy intellekt qatlami vazifasini bajarishi mumkin.
Bugungi kunda OpenAI, Anthropic va xAI asosan raqamli AI mahsulotlariga e’tibor qaratayotgan bo‘lsa, Google DeepMind jismoniy dunyoda ishlovchi sun’iy intellektni rivojlantirishga katta sarmoya kiritmoqda. Gemini Robotics 2 kompaniyaning «AI agentlar»dan keyingi bosqich — real dunyoda harakatlana oladigan va vazifalarni mustaqil bajara oladigan robotlar sari eng muhim qadamlardan biri sifatida ko‘rilmoqda.
