2025-yilda Kaliforniyaning Mountain View shahrida bo‘lib o‘tgan Google I/O konferensiyasida kompaniya o‘zining hozirgacha eng katta sun’iy intellekt strategiyasini taqdim etdi. Qidiruv tizimining to‘liq yangilanishidan tortib, kuchli AI obunalari va futuristik aqlli ko‘zoynaklargacha. Google aniq ishora berdi: u AI poygasida shunchaki yetib olmoqchi emas, yetakchilikni maqsad qilgan.
AI davrida qidiruv
Google’ning asosiy mahsuloti — Search tubdan o‘zgarish bosqichiga kirdi. Yangi taqdim etilgan “AI rejimi” foydalanuvchilarga murakkab va ko‘p qismli savollarni kiritishga imkon beradi hamda an’anaviy havolalar ro‘yxati o‘rniga sun’iy intellekt tomonidan yaratilgan javoblarni taqdim etadi. Klassik ko‘k havolali formatdan voz kechib, intuitiv va suhbatga asoslangan interfeysga o‘tiladi.
AI hozirda moliya, sport va xaridlar kabi mavzularda nozik, real vaqtli javoblarni taqdim etadi. Hatto foydalanuvchilarga “try it on” vizual funksiyasi orqali kiyimlarni virtual tarzda sinab ko‘rish imkonini ham beradi. Dastlab eksperiment sifatida boshlangan bu funksiya endi AQSh bo‘ylab ishga tushirilmoqda va Google’ning dunyo axborotini tartibga solish bo‘yicha yangi yondashuvida markaziy o‘rin egallamoqda.
Google shuningdek Search Live funksiyasini tanishtirdi — u telefon kamerasi orqali ko‘rilayotgan manzara asosida real vaqtli qidiruvni amalga oshiradi. Deep Search va Project Mariner esa AI’ga veb-sahifalarni chuqurroq tahlil qilish va foydalanuvchi ishtirokisiz chipta bron qilish yoki saytlarda harakatlanish kabi vazifalarni avtomatlashtirish imkonini beradi.
AI tomonidan yaratilgan natijalar sayt trafigiga salbiy ta’sir qilishi mumkin degan xavotirlarga qaramay, Google bu evolyutsiya veb faolligini kengaytiradi, deb ishontirmoqda.
Gemini Ultra
Google’ning eng dadil qadami oyiga $249.99 narxda taqdim etilgan Gemini Ultra obuna rejasining ishga tushirilishi bo‘ldi. Bu yuqori darajadagi paket foydalanuvchilarga kompaniyaning eng ilg‘or AI vositalaridan foydalanish imkonini beradi, jumladan:
- Gemini 2.5 Pro — Deep Think rejimi bilan ko‘p bosqichli mantiqiy tahlilni amalga oshiradi.
- Project Mariner — foydalanuvchi o‘rniga saytlarni ko‘zdan kechirib, harakat qiladigan AI agenti.
- Veo 3 — film darajasidagi sahnalarni, suhbatlar, ovoz effektlari va harakatlar bilan birga yaratadigan video generatsiya modeli.
- Imagen 4 — realistik tuzilma va 2K vizualga ega ultra-tez, yuqori aniqlikdagi rasm generatori.
- Gemini Live — foydalanuvchi bilan real vaqt rejimida muloqot qiluvchi AI yordamchi, telefon kamerasidagi yoki ekranidagi ko‘rinishlar asosida ishlaydi.
- 30TB Google Drive xotirasi va YouTube Premium obunasi.
Ushbu obuna rejasi orqali Google o‘zini OpenAI va Anthropic kabi yirik AI obuna xizmatlari qatoriga qo‘shmoqda.
Project Astra va aqlli qurilmalarning kelajagi
Konferensiyadagi eng muhim lahzalardan biri — Google’ning aqlli ko‘zoynaklar sohasiga qaytishi bo‘ldi. Namoyishda ikki kishi turli tillarda suhbatlashar ekan, ko‘zoynaklar linza orqali jonli tarjima taqdim etdi. Bu texnologiya Project Astra — Google DeepMind tomonidan ishlab chiqilgan, past kechikishli va multimodal AI platformasi yordamida ishlaydi. Ko‘zoynaklar foydalanuvchining atrofidagi muhitga oid savollarga ham javob bera oldi.
Google shu yili Samsung bilan hamkorlikda XR headset (kengaytirilgan reallik qurilmasi)ni ishga tushirishni rejalashtirmoqda va Warby Parker hamda Gentle Monster bilan Android XR tizimida ishlaydigan kelajakdagi AR ko‘zoynaklarini ishlab chiqish uchun hamkorlik qilmoqda.
Har qadamda AI
Sun’iy intellekt endi Google ekotizimining deyarli har bir qismiga chuqur integratsiya qilinmoqda. Gemini ilovasi hozirda oyiga 400 milliondan ortiq foydalanuvchiga ega. Yangilanishlarga quyidagilar kiradi:
- Chrome’dagi Gemini — veb-sahifalarni kontekst asosida tushunish imkonini beradi.
- Workspace’dagi AI funksiyalari — Gmail, Docs va Vids’da individual aqlli javoblar, email’larni tozalash va kontent yaratish vositalari mavjud.
- NotebookLM yangiliklari — foydalanuvchiga moslashtirilgan PDF va rasm yuklashni qo‘llab-quvvatlaydi.
- SynthID Detector — AI tomonidan yaratilgan kontentni aniqlash uchun suv belgisi (watermark) vositasi.
- Stitch — matn yoki rasm asosida HTML/CSS ilova interfeyslarini yaratadigan vosita.
- Jules — kod xatolarini tuzatish, GitHub boshqaruvi va kodni tushunishga yordam beruvchi AI dasturchi yordamchisi.
- Android Studio’dagi yangiliklar — “Journeys” va “Agent Mode” kabi vositalar orqali murakkab ish jarayonlarini AI zimmasiga yuklash, shuningdek, Gemini asosidagi real vaqtli xatolik tahlili bilan kodni tezda tuzatish imkoniyati taqdim etilmoqda.
Qurilmalar va dasturchilar uchun vositalar
Wear OS 6 yangilanishi bilan Pixel Watch soatlariga dinamik mavzular (dynamic theming) va foydalanuvchi interfeysi yaxshilanishlari kiritildi. Play Store esa dasturchilar uchun yangi obuna boshqaruvi vositalari, tezlashtirilgan test tizimi va filmlar hamda ko‘rsatuvlar kabi tanlab olingan kontent sahifalarini taqdim etdi.
Android Studio endi yanada yaxshiroq xatolik tahlili va nosozliklarni tuzatish vositalari bilan boyitilgan.
Shuningdek, ilgari Starline nomi bilan tanilgan Beam qayta taqdim etildi — bu 3D telepresence texnologiyasi bo‘lib, real vaqt rejimidagi tarjima va ko‘p rakursli kameralar orqali realistik tasvirlarni yaratishga qodir.
AI — Endilikda Google’ning asosiy strategiyasi
Alphabet bosh direktori Sundar Pichai AI texnologiyasi qidiruv tizimini almashtirmasligini, balki uni kuchaytirishini va kengaytirishini ta’kidladi. Uning aytishicha, sun’iy intellekt asosidagi funksiyalar Google’ga ilgari hech qachon amalga oshirib bo‘lmagan murakkab holatlar bo‘yicha xizmat ko‘rsatish imkonini bermoqda.
Bu yil AI bilan bog‘liq kapital xarajatlar uchun ajratilgan $75 milliarddan ortiq mablag‘ Google o‘z kelajagini AI asosida qurilgan ekotizimda ko‘rayotganini yaqqol ko‘rsatadi. Bu tizimda AI oddiy funksiya emas — asos bo‘lib xizmat qiladi.
Raqobatchilar shunga o‘xshash imkoniyatlar taqdim etishga oshiqayotgan bir paytda, Google’ning xabari aniq: qidiruv, kontent yaratish va unumdorlikning kelajagi — bu generativ, multimodal va har bir ekran orqali chuqur integratsiyalashgan AI tizimidir.
Tayyorladi: Navro‘zaxon Bo‘riyeva
