Halyk Bank va uning asosiy aksiyadori — “ALMEX” xolding guruhi bank aksiyalarining ikkilamchi ommaviy taklifi (SPO) bo‘yicha yakuniy narx va joylashtirish natijalarini e’lon qildi. Ushbu jarayon 19 noyabr kuni boshlangan bo‘lib, xalqaro hamda mahalliy bozorlarda investorlar orasida yuqori qiziqish uyg‘otdi.
Joylashtirish doirasida 17 milliondan ortiq xalqaro GDR, shuningdek 205 ming dona mahalliy GDR va 121,8 million oddiy aksiyalar sotildi. Bir dona GDR 40 dona oddiy aksiyaga teng ekani inobatga olinganda, taklif bankning muomaladagi aksiyalarining qariyb 7,6 foizini tashkil etdi. Taklifning umumiy qiymati 475,41 million AQSH dollariga teng bo‘ldi. Aksiyalarning yakuniy narxi 298,66 tenge etib belgilangan bo‘lsa, GDRlar 23 dollar qiymatda joylashtirildi. Xalqaro taklif asosan chet ellik institutsional investorlar tomonidan qabul qilingan, mahalliy bozor esa nafaqat GDR, balki katta hajmdagi oddiy aksiyalarni ham o‘zlashtirdi. Mazkur joylashtirishdan to‘plangan mablag‘lar bankning o‘ziga emas, balki aksiyalarni sotayotgan ALMEX xoldingiga yo‘naltirilishi belgilangan.
SPOning xalqaro qismi bo‘yicha GDRlar 25 noyabr kuni London fond birjasida savdoga chiqarilishi rejalashtirilgan. Mahalliy GDRlar AIX birjasida, oddiy aksiyalar esa KASEda 26 noyabrdan boshlab muomalaga kiritiladi. Bitim yakuniga ko‘ra, ALMEX guruhi bank aksiyalarining 62 foiziga egalik qilishda davom etadi va qolgan aksiyalar paketi bo‘yicha 365 kunlik lock-up majburiyatini olgan, bu esa ularga kelgusida qo‘shimcha sotuvlarni cheklash majburini yuklaydi.
Joylashtirish jarayonida dunyoning yetakchi moliya institutlari — Citigroup Global Markets Limited va J.P. Morgan Securities plc — xalqaro bozor bo‘yicha yetakchi koordinatsiya ishlarini amalga oshirdi. Mahalliy bozor esa Halyk Finance boshqaruvida amalga oshirildi. Bu yirik moliyaviy institutlarning ishtiroki nafaqat bitimning ishonchliligini oshirdi, balki Halyk Bankning xalqaro bozordagi mavqeini mustahkamladi.
Press-relizda ushbu taklif bir qator yurisdiktsiyalarda, xususan AQSH, Kanada, Yaponiya, Avstraliya va Janubiy Afrikada ommaviy tarzda tarqatilishi mumkin emasligi alohida qayd etiladi. Yevropa Ittifoqi mamlakatlari va Buyuk Britaniyada esa faqat malakali investorlar uchun mo‘ljallangan. Qozog‘iston ichida ham bu e’lon reklama yoki keng ommaga qaratilgan investitsiya taklifi sifatida talqin qilinmasligi lozimligi ta’kidlanadi.
Mazkur SPOning muvaffaqiyatli yakunlanishi Halyk Bank aksiyalariga bo‘lgan barqaror talab va bozor ishonchining yuqori darajada ekanidan dalolat beradi. Yirik xalqaro investorlarning ishtiroki, taklifning to‘liq o‘zlashtirilishi va qat’iy tartib-qoidalar asosida amalga oshirilgan jarayon Qozog‘iston moliya bozorining jozibadorligini yana bir bor tasdiqlaydi.
