Global texnologiya bozorida yana o‘zbek ismlari jaranglamoqda. Vatandoshlarimiz Beknazar, Aziz va ularning sheriklari tomonidan rivojlantirilayotgan Hupo sun’iy intellekt startapi A seriyali bosqichda 10 million dollar sarmoya jalb qildi.
Ushbu raundga dunyoning eng nufuzli venchur fondlaridan biri — DST Global Partners (Facebook, Twitter, Alibaba, Spotify kabi gigantlarning ilk investori) yetakchilik qildi. Bu O‘zbekistonlik mutaxassislar ishtirokida qurilgan loyihaning jahon miqyosida tan olinayotganini ko’rsatadi.
Loyiha tarixi oson kechmadi. Jamoa dastlab Ami nomi ostida ruhiy salomatlikni yaxshilash platformasini yaratgan edi. Biroq, bozor talabini va o‘z kuchli tomonlarini qayta tahlil qilib, ular startap yo‘nalishini keskin o‘zgartirishga (pivot) qaror qilishdi.
Natijada Hupo paydo bo‘ldi. Ular ruhiy barqarorlik va inson psixologiyasi bo‘yicha to‘plangan noyob tajribani savdo kouchingi (sales coaching) sohasiga yo‘naltirishdi. Bugungi kunda Hupo bank va sug‘urta xodimlariga sun’iy intellekt yordamida qanday qilib yaxshiroq sotishni o‘rgatmoqda.
Startap bir yilga to‘lmasdanoq erishgan natijalari bilan investorlarni hayratda qoldirdi. Hupo’ning rasmiy blogidagi ma’lumotlarga ko‘ra:
- Global mijozlar: Hozirda 20 dan ortiq yirik korporatsiyalar, jumladan HSBC, AXA, Prudential, Manulife va Grab ushbu o‘zbek yigitlari ishtirokida yaratilgan tizimdan foydalanmoqda.
- Shartnomalar o‘sishi: Mijozlar dastlabki 6 oy ichida Hupo bilan hamkorlik hajmini 3 dan 8 barobargacha oshirgan.
- Samaradorlik: Savdo xodimlarining natijalari 3 barobarga yaxshilangan.
- Tezkor start: Yangi ishga olingan xodimlarning birinchi savdoni amalga oshirish vaqti ~75% ga qisqargan.
Hupo jamoasi o‘z blogida shunday yozadi:
«Kapitalning o‘zi muammolarni hal qilmaydi, buni ijro (execution) hal qiladi. Biz shu kungacha erishgan natijalarimiz va jamoamiz bilan faxrlanamiz.»
Aynan shu «ijro»ning markazida vatandoshlarimizning mehnati va zakovati yotibdi.
Jalb qilingan $10 million dollar startapga AQSh bozoriga kirib borish, texnologiyani yanada kuchaytirish va jamoani kengaytirish imkonini beradi.
Beknazar, Aziz va butun Hupo jamoasiga ushbu muvaffaqiyat muborak bo‘lsin! O‘zbekistonlik yoshlarning Silikon vodiysi va global arenalarda bunday natija ko‘rsatishi barchamiz uchun faxr va motivatsiya manbaidir.
Eslatib o‘tamiz, Pivot.uz’da avvalroq Hupo $4 million dollar investitsiya jalb qilgani haqida yozgilgan edi.
