22-sentabr kuni Toshkentdagi CAEx majmuasida ICT WEEK Uzbekistan 2026 doirasida Startup & Venture Summit bo‘lib o‘tadi. Tadbir startap asoschilari, investorlar, venchur fondlari, akseleratorlar, korporatsiyalar va davlat tashkilotlari vakillarini bir maydonda jamlaydi.
Sammit O‘zbekiston va Markaziy Osiyodagi startap hamda venchur ekotizimining keyingi rivojlanish bosqichiga bag‘ishlanadi. Unda mintaqadagi texnologik tadbirkorlikning o‘sishi, startaplarning xalqaro bozorlarga chiqishi, investitsiya jalb qilish, venchur kapital bozori va mahalliy loyihalarni global ekotizimga integratsiya qilish masalalari muhokama qilinadi.
Startup & Venture Summit o‘tgan yili ham ICT WEEK doirasidagi asosiy startap tadbirlaridan biri bo‘lgan. 2025-yilgi sammitda 500 dan ortiq ishtirokchi, jumladan, startaplar, venchur fondlari, akseleratorlar, korporatsiyalar, davlat tashkilotlari va xalqaro ekspertlar qatnashgan.
O‘tgan yilgi sammit doirasida xalqaro bozorlarga chiqish, rivojlanayotgan bozorlarga investitsiya kiritish va korporatsiyalarning startap ekotizimidagi roli kabi mavzular muhokama qilingan. Xususan, Plug and Play Tech Center, Sturgeon Capital, Alchemist Accelerator, Purple Ventures, TBC, Payme va BILLZ kabi kompaniya va tashkilotlar vakillari o‘z tajribasi bilan o‘rtoqlashgan.
2025-yilgi sammitda AloqaVentures beshta O‘zbekiston va mintaqa startapiga jami $750 ming investitsiya kiritishini e’lon qilgandi. Jumladan, Paidax $200 ming, EGARANTI $250 ming, KINESTEX $150 ming, TRIDMO $50 ming va RENTA $100 ming investitsiya olgan.
Yana bir yirik natija sifatida €20 mln hajmdagi DOMiNO Uzbekistan Fund tashkil etilishi e’lon qilingan. DOMiNO Ventures tomonidan yaratilgan fondga UzVC anchor investor sifatida €10 mln yo‘naltirgan. Fond sun’iy intellekt, deeptech va cleantech yo‘nalishidagi loyihalarga investitsiya qilishga qaratilgan.
Shuningdek, IT Park Ventures AWS Activate Providers global tarmog‘iga qo‘shilgan. Hamkorlik doirasida startaplar $10 minggacha AWS promotional credit, maxsus takliflar va xalqaro miqyosda masshtablanishga yordam beruvchi AWS Activate vositalaridan foydalanish imkoniyatiga ega bo‘lgan.
2026-yilgi Startup & Venture Summit dasturida ham soha ekspertlarining chiqishlari, panel muhokamalari, founderlar tajribasiga bag‘ishlangan sessiyalar hamda startaplar va investorlar o‘rtasidagi uchrashuvlar o‘rin oladi. Tadbir mahalliy startaplar uchun xalqaro fondlar, akseleratorlar va potensial hamkorlar bilan aloqa o‘rnatish, investorlar uchun esa O‘zbekiston va Markaziy Osiyodagi yangi texnologik loyihalar bilan tanishish imkonini beradi.
Bunday uchrashuvlar o‘tgan yilgi sammitda ham alohida B2B formatida tashkil etilgan: ishtirokchilar 20 daqiqalik oldindan rejalashtirilgan uchrashuvlar orqali hamkorlik yo‘nalishlari, pilot loyihalar, xalqaro dasturlar va yangi texnologiyalarni sinovdan o‘tkazish imkoniyatlarini muhokama qilgan. Startup & Venture Summit 22-sentabr kuni soat 14:00 dan 17:00 gacha CAEx majmuasining Hall 1 zalida bo‘lib o‘tadi.
