O‘zbekistonda tadbirkorlik subyektlarida sun’iy intellekt texnologiyalarini joriy etishni rag‘batlantirish bo‘yicha yangi dastur ishga tushiriladi. «10 ming korxona uchun — sun’iy intellekt hamkor» dasturi doirasida korxonalarning AI texnologiyalarini joriy qilish xarajatlarining 50 foizi kompensatsiya qilinadi.
Shuningdek, yangi mahsulot yaratish uchun sun’iy intellekt modelini ishlab chiqayotgan tadbirkorlarga superkompyuter infratuzilmasidan bepul foydalanish imkoniyati beriladi. Bunday loyihalarning ilmiy-tadqiqot xarajatlari ham davlat budjeti hisobidan qoplanadi.
Raqamli hukumat loyihalarini boshqarish markazida O‘zbekistondagi ilk superkompyuter klasteri ishga tushirilgan. Kelasi yilda uning hisoblash quvvati uch baravarga oshirilishi rejalashtirilgan.
Tadbirkorlar foydalanishi mumkin bo‘lgan tayyor AI yechimlari ham ochiq platformaga joylashtiriladi. Dasturning dastlabki bosqichiga kamida $100 mln yo‘naltiriladi.
AI texnologiyalarini joriy etish bo‘yicha mavjud tajriba boshqa tarmoqlarga ham kengaytiriladi. Xususan, elektrotexnika, qurilish materiallari va oziq-ovqat sanoati korxonalarida avtomatlashtirilgan boshqaruv tizimlarini joriy qilish xarajatlarining 50 foizi qoplab beriladi.
Rasmiy ma’lumotlarga ko‘ra, zamonaviy boshqaruv va sun’iy intellekt yondashuvlarini joriy qilgan tadbirkorlarning 54 foizida mahsulotga talab sezilarli oshgan. 25 foizida tannarx pasaygan, 40 foizida esa daromad o‘sishi hisobiga xodimlar ish haqi 10 foizdan ko‘proqqa oshgan.
Yangi choralar O‘zbekistonda AI texnologiyalarini nafaqat IT sohasida, balki real sektor va ishlab chiqarish korxonalarida ham keng joriy etishga qaratilgan.
