Ukrainaning yetakchi mobil aloqa operatori Kyivstar AQSh fond birjasida ro‘yxatga chiqish orqali $50 milliondan $200 milliongacha mablag‘ jalb qilishni maqsad qilmoqda, deb xabar berdi Reuters o‘z manbalariga tayanib.
24 million abonentga ega kompaniya 2025-yilning uchinchi choragida Nasdaq’da ro‘yxatga chiqadigan ilk Ukraina kompaniyasi bo‘lishi kutilmoqda.
Kyivstar’ning asosiy egasi — xalqaro telekommunikatsiya guruhi Veon — listingdan so‘ng ham kompaniya aksiyalarining kamida 80 foizini o‘zida saqlab qolishini bildirgan.
Reuters ma’lumotiga ko‘ra, kompaniya allaqachon $52 million hajmidagi sarmoya majburiyatlarini qo‘lga kiritgan. Bu mablag‘lar institutsional investorlar bilan tuzilgan aksiyalarni qaytarib olmaslik (non-redemption) kelishuvlari orqali ta’minlangan. Avvalroq Kyivstar’ning qiymati $2,21 milliard deb baholangan edi.
Veon bosh direktori Kaan Terziogluning so‘zlariga ko‘ra, Ukrainadagi yetakchi mobil operatorning Nasdaq’da ro‘yxatga chiqishi mamlakat infratuzilmasini tiklash jarayonida investorlarning Ukraina aktivlariga bo‘lgan qiziqishini oshirishi mumkin.
Listing tartibi
Listing Cohen Circle — Nyu-Yorkdagi sarmoya kompaniyasi — orqali amalga oshiriladi. Bu SPAC (Special Purpose Acquisition Company) modeli bo‘lib, an’anaviy IPOga qaraganda tezroq va soddaroq ommaga chiqish imkonini beradi.
2025-yil yanvarida Veon Cohen Circle bilan anglashuv xatini imzolagan. Listing yakunlangach, Kyivstar Group yangi bosh kompaniya sifatida Nasdaq’da KYIV tikkeri ostida savdo qiladi.
So‘nggi strategik qadamlar
- 2025-yil mart oyida Kyivstar Uklon taksi chaqirish xizmatini $155 million evaziga sotib oldi va Veon tarmog‘i orqali yangi bozorlarni zabt etishni rejalashtirmoqda.
- 2024-yil dekabrida kompaniya SpaceX bilan hamkorlik e’lon qilib, Starlink direct-to-cell xizmatiga ulanish imkoniyatini yaratdi.
Ushbu listing AQSh, Ukraina va Yevropa Ittifoqi hukumatlari tomonidan qo‘llab-quvvatlangan.
