Bugungi raqamli dunyoda layklar, repostlar va obunachilar soni inson qadriyatining belgilab o‘lchoviga aylangandek tuyuladi. Ammo Neptune nomli yangi ilova bu yondashuvga mutlaqo boshqacha qaramoqda. U oddiy TikTok nusxasi emas — u auditoriya va ijodkor o‘rtasidagi munosabatni tubda o‘zgartirish, diqqatni mashhurlikka emas, balki kontent sifatiga qaratish maqsadida yaratilgan.
Neptune ilovasiga Eshli Darling asos solgan – u ilgari OPTYX agentligida ilgari iste’dodlar bo‘yicha direktor lavozimida ishlagan. Hozircha loyiha beta bosqichida, biroq atrofida katta qiziqish shakllangan. 1 000 ga yaqin foydalanuvchi platformani sinab ko‘rmoqda, 400 000 dan ortig‘i esa navbatda turibdi. Rasmiy ravishda App Store’dagi taqdimot keyingi haftaga , Android versiyasi esa shu yil oxiriga rejalashtirilgan.
Raqamlarni yashiradigan platforma
Neptune’ning eng ajralib turadigan jihati — “ghost metrics”, ya’ni layklar va obunachilar sonini yashirish imkoniyatidir. Bu raqamlar ortidan quvishdan charchagan yoki mashhurlik bosimini his qilgan foydalanuvchilar uchun haqiqiy yengillik. Maqsad – raqobat emas, ijod markazda bo‘lish kerak.
Platformaning algoritmi ham odatdagidan farq qiladi. U ko‘proq auditoriyaga ega yirik blogerlar emas, balki foydalanuvchilarning qiziqishlari va kontent sifati asosida postlarni tavsiya qiladi. Demak, atigi bir necha obunachiga ega bo‘lgan inson ham agar postlari odamlar bilan rezonans bersa — mashhur bo‘lishi mumkin. Bu esa kichik ijodkorlar va yangi boshlovchilar uchun katta imkoniyat bo‘lishi mumkin.
Stresslarsiz pul ishlash imkoniyati
Neptune ijodkorlarning daromad topish usullarini ham yangicha yondashuv bilan ko‘rib chiqmoqda. Faqat reklama daromadiga tayanish o‘rniga, platforma tips (pulli sovg‘alar), jonli efirlar va pullik obunalar orqali ko‘proq erkinlik beruvchi imkoniyatlar yaratmoqchi. Bu esa ijodkorlar uchun doimiy ko‘rishlar yoki homiyliklarga bog‘liq bo‘lmagan daromad manbai degani.
Hozircha barcha funksiyalar ishga tushmagan bo‘lsa-da, jamoa tez orada jonli efir, musiqiy kontent integratsiyasi va maxsus tanlangan pleylistlarni taqdim etishni rejalashtirgan.
Nega bu muhim?
Neptune aynan shunday bir paytda paydo bo‘ldiki, ijtimoiy tarmoq foydalanuvchilari — ayniqsa Gen Z va yosh millenniallar — mashhurlik tushunchasiga tobora tanqidiy yondashmoqda. Ijtimoiy tarmoqlar bilan bog‘liq ruhiy salomatlik muammolari keng hujjatlashtirilgan, Instagram va TikTok esa odamlarni taqqoslash va yuzaki aloqalarni targ‘ib qilgani uchun tanqid ostida qolgan.
Neptune foydalanuvchilarga layklar va obunachilar sonini yashirish huquqini berib, o‘zini boshqalardan farqli tarmoq sifatida ko‘rsatmoqda. Bu mashhurlikni butunlay yo‘q qilish emas — kim xohlasa, raqamlarini ochiq qoldirishi mumkin. Ammo maqsad — ijtimoiy tarmoqlarni kamroq toksik, ko‘proq mazmunli qilish.
Ayni paytda TikTok’ning kelajagi, ayniqsa AQShda, noaniq bo‘lib turgan bir davrda, Neptune bozorda eng to‘g‘ri paytda sahnaga chiqmoqda.
Yangi avlod ijtimoiy tarmog‘i
Neptune TikTok, YouTube va Instagram kabi gigantlar hukmronlik qilayotgan olamda o‘z o‘rnini topa oladimi — buni vaqt ko‘rsatadi. Biroq ilk mashhurligi va ulkan kutishlar ro‘yxati shuni anglatadiki, odamlar haqiqatan ham yangicha tajriba izlamoqda.
Raqamlar ijodkorlikdan balandroq ovoz chiqargan raqamli dunyoda, Neptune o‘yinni o‘zgartirmoqchi: bu yerda siz yaratgan narsa, sizda nechta obunachi borligidan ko‘ra muhimroq.
Tayyorladi: Navro‘zaxon Bo‘riyeva
Fikr bildirish