OpenAI dasturchilar uchun mo‘ljallangan ilk apparat mahsuloti — Codex Micro mini-klaviaturasini taqdim etdi. Qurilma sotuvga chiqarilganidan so‘ng 24 soatdan kam vaqt ichida barcha nusxalari sotilib ketdi.
Codex Micro oddiy klaviatura emas. U OpenAI’ning Codex AI dasturlash yordamchisi bilan ishlashni tezlashtirish uchun yaratilgan maxsus boshqaruv paneli bo‘lib, kompaniya uni mexanik klaviaturalar ishlab chiqaruvchi Work Louder bilan hamkorlikda ishlab chiqqan. Qurilma narxi 230 dollar etib belgilangan.
Mini-klaviaturada 13 ta mexanik tugma, joystik, aylanuvchi boshqaruv g‘ildiragi (rotary dial) va sensorli boshqaruv elementlari mavjud. Eng e’tiborga molik jihati esa — olti rangli Agent Keys bo‘lib, ular Codex AI agentlarining holatini real vaqt rejimida ko‘rsatadi. Shu orqali dasturchilar agent vazifa bajarayotgani, javob kutayotgani yoki xatolik yuz berganini ilovaga kirmasdan turib ham kuzata oladi.
Qurilma ChatGPT Desktop ilovasi bilan integratsiyalashgan. Maxsus tugmalar yordamida foydalanuvchilar yangi chat boshlashi, AI tomonidan taklif qilingan kodni tasdiqlashi yoki rad etishi, ovoz orqali buyruq yuborishi hamda joystik orqali kodni tekshirish, debugging va pull request’larni ko‘rib chiqish kabi tezkor amallarni bajarishi mumkin. Rotary dial esa AI agentining reasoning level — ya’ni vazifa ustida qanchalik chuqur fikrlashini boshqarishga xizmat qiladi.
Codex Micro ko‘pchilik kutayotgan OpenAI va Jony Ive hamkorligidagi yangi AI qurilmasi emas. Bu Codex bilan ishlashni qulaylashtirish uchun ishlab chiqilgan, cheklangan miqdorda chiqarilgan maxsus klaviatura hisoblanadi.
Qurilmaning bir kun ichida sotilib ketgani AI dasturlash vositalari uchun maxsus apparat yechimlariga talab ortib borayotganini ko‘rsatmoqda. Bu OpenAI’ning apparat ekotizimiga kirish yo‘lidagi dastlabki qadamlardan biri bo‘lib, kompaniya kelajakda dasturiy ta’minotdan tashqari yangi qurilmalarni ham taqdim etishi mumkinligini anglatadi.
