O‘zbekiston Senati lotin yozuviga asoslangan o‘zbek alifbosini joriy etish bo‘yicha qonunga o‘zgartirishlar kiritishni ma’qulladi. Yangi tartib alifbodagi o‘zgarishlarga bosqichma-bosqich o‘tishni nazarda tutadi.
Qonun kuchga kirguniga qadar amaldagi alifbo asosida rasmiylashtirilgan hujjatlar o‘z kuchini saqlab qoladi. Shuningdek, shu yozuvda chiqarilgan milliy valyuta va qimmatli qog‘ozlarning muomalada bo‘lishiga to‘sqinlik qilinmaydi.
O‘zgarishlar tashqi reklama va peshlavhalarga ham tegishli. Hozirda do‘konlar va servis markazlarida ishlatilayotgan O‘, G‘, Sh va Ch harflari yangi ko‘rinishga mos kelmasa ham, bunday peshlavhalardan ular yaroqsiz holatga kelguniga qadar yoki belgilangan muddat tugaguncha foydalanishga ruxsat beriladi. Davlat organlari va tashkilotlarining ayrim ramziy belgilari, peshlavha va ko‘rsatkichlari uchun ham xuddi shunday tartib belgilanmoqda.
Qonundagi bu normalar yangi alifboga o‘tish jarayonida mavjud hujjatlar, belgilar va boshqa materiallarni darhol almashtirish zaruratini kamaytirishga qaratilgan. Natijada fuqarolar va tashkilotlarning amaldagi hujjatlari hamda foydalanishdagi belgilarini bir vaqtning o‘zida yangilash talabi yuzaga kelmaydi.
