Malayziyaning Kuala-Lumpur shahrida Prezident Shavkat Mirziyoyev va Malayziya Bosh vaziri Anvar Ibrohim ishtirokida o‘tgan biznes-forum davomida ikki mamlakat o‘rtasidagi hamkorlikni kengaytirish masalalari muhokama qilindi.
Tadbirda O‘zbekiston va Malayziyaning yetakchi kompaniyalari, investitsion hamda moliyaviy institutlarining 200 dan ortiq vakillari qatnashdi. Malayziya tomonidan Petronas, MMC Corporation, DRB-Hicom, Gemilang Coachwork, Proton, Gentari, Five Petroleum, YTL Corporation, Sunview Group, KPJ Healthcare, MK Tron, Mimos, Sparco Engineering, Tradewinds Group, Kapital DX, Gamuda, Westports, Khazanah, EXIM Bank of Malaysia kabi yirik kompaniyalar vakillari ishtirok etdi.
Uchrashuv davomida ikki davlat o‘rtasidagi innovatsion hamkorlikni rivojlantirish bo‘yicha ikki yillik reja tasdiqlandi va o‘zaro hamkorlikning ustuvor yo‘nalishlari belgilandi.
Malayziya O‘zbekiston uchun muhim texnologik va innovatsion sherik sifatida qayd etildi. Shu munosabat bilan, ikki davlat o‘rtasida elektronika va yarimo‘tkazgichlar sanoatini rivojlantirish, sun’iy intellekt, raqamli texnologiyalar va data-markazlar tashkil etish bo‘yicha yangi loyihalarni amalga oshirish imkoniyatlari muhokama qilindi.
Manba: president.uz
