Joriy yilning 11 oyida O‘zbekistonning tashqi savdo aylanmasi $59,36 mlrdni tashkil etdi. Bu o‘tgan yilning shu davriga nisbatan 3,6%ga oshgan. Bu o‘sish eksportning $24,22 mlrd (+4,4%) va importning $35,14 mlrd (+3%) ga oshgani bilan bog‘liq.
O‘tgan oyda O‘zbekiston oltin eksport qilmagan, oktabrda esa bu metall $833,4 mlnlik qiymatda realizatsiya qilingan edi. Joriy yilning boshidan beri oltin eksporti $6,62 mlrdni tashkil etib, bu ko‘rsatkich yillik hisobda 18,7%ga kamaygan.
Savdo bo‘yicha O‘zbekistonning eng yirik hamkori Xitoy bo‘lib, umumiy tovar aylanmasi $11,25 mlrdga yetgan. Shuningdek, Xitoy mamlakatga $9,34 mlrdlik tovar yetkazib bergan. Rossiya esa $10,68 mlrd bilan ikkinchi o‘rinni egallagan, bunda ushbu yo‘nalishdagi eksport $3,41 mlrdga oshgan.
Qozog‘iston ($3,85 mlrd), Turkiya ($2,63 mlrd) va Janubiy Koreya ($1,8 mlrd) asosiy savdo hamkorlari ro‘yxatidan joy oldi. Muhim hamkorlar orasida Fransiya, Afg‘oniston, Qirg‘iziston va Tojikiston bilan savdo profitsiti qayd etildi.
Eksportning asosiy yo‘nalishlari
Oltindan tashqari, sanoat mahsulotlari eksportning asosiy qismi bo‘lib qolmoqda. Bu mahsulotlar eksportidan tushgan tushum $3,88 mlrd (+3,6%) ni tashkil etdi.
Shuningdek, oziq-ovqat mahsulotlari eksporti $1,97 mlrd (+19,8%) ga yetdi, bunda sabzavot va meva eksporti 30,9%ga o‘sib, $1,44 mlrdni tashkil etdi.
Kimyoviy mahsulotlar eksporti ham 24,6%ga o‘sib, $1,5 mlrdga yetgan. Rangli metallar eksporti esa 9,2%ga oshgan bo‘lib, $1,4 mlrdni tashkil etdi.
Import ko‘rsatkichlari
Mashinasozlik mahsulotlari $12,15 mlrd (-8,1%) bilan importda yetakchilik qilmoqda. Sanoat tovarlari importi $5,52 mlrd (-3,5%) ni tashkil etgan.
Yoqilg‘i va moylash materiallari importi 61%ga oshib, $3,62 mlrdga yetgan. Gaz importi 2,8 baravarga ko‘payib, $1,55 mlrdni tashkil qilgan.
Shuningdek, oziq-ovqat mahsulotlari importi $3,33 mlrd (+5,6%) ni tashkil etdi, bunda shakar va qandolat mahsulotlari importi 11,6%ga o‘sdi.
