Raqamli taraqqiyot yo‘lidagi muhim qadam
O‘zbekiston raqamli iqtisodiyotni barpo etish va innovatsion texnologiyalarni hayotning barcha sohalariga joriy etish yo‘lida izchil harakatlanmoqda. 2025-yil 22-oktabr kuni Prezidentning “Sun’iy intellekt texnologiyalarini yanada rivojlantirishga oid qo‘shimcha chora-tadbirlar to‘g‘risida”gi PF–189-son Farmoni imzolandi. Mazkur hujjat mamlakatda sun’iy intellekt (AI) sohasini tizimli rivojlantirishning yangi bosqichini belgilab berdi.
Farmonning asosiy yo‘nalishlari
Farmonning ustuvor maqsadlaridan biri — davlat boshqaruvi, ijtimoiy soha va iqtisodiyot tarmoqlariga sun’iy intellekt texnologiyalarini keng tatbiq etish hisoblanadi. Shu maqsadda 2026-yil yakuniga qadar kamida 100 ta loyiha amalga oshirilishi ko‘zda tutilgan.
Bu tashabbuslar raqamli transformatsiya jarayonlarini tezlashtirish va davlat xizmatlarining samaradorligini oshirishga xizmat qiladi.
Bundan tashqari, 2030-yilgacha 1 milliard AQSh dollaridan ortiq xorijiy investitsiyalarni jalb etish orqali zamonaviy sun’iy intellekt infratuzilmasini yaratish rejalashtirilgan. Bu esa xalqaro hamkorlikni mustahkamlash va mamlakatda innovatsion muhitni rivojlantirish imkonini yaratadi.
Farmonda ta’lim sohasiga ham alohida e’tibor qaratilgan. 2026-yilgacha yurtimizdagi oliy ta’lim muassasalarida 15 ta sun’iy intellekt laboratoriyalari tashkil etiladi. Bu yosh mutaxassislar uchun ilmiy izlanish va innovatsion g‘oyalarni amalga oshirish uchun yangi imkoniyatlar eshigini ochadi.
Milliy platforma va yangi imkoniyatlar
2025-yil yakuniga qadar “AI.gov.uz” milliy portali ishga tushiriladi. Ushbu platformada mamlakatdagi sun’iy intellekt sohasiga oid loyihalar, dasturlar, startaplar va bepul onlayn kurslar haqidagi ma’lumotlar jamlanadi.
Portal nafaqat ma’lumot maydoni, balki sun’iy intellekt sohasi uchun yagona ekotizim vazifasini bajaradi.
Yoshlar va innovatsiyalar uchun rag‘bat
2026-yil 1-yanvardan boshlab O‘zbekiston Respublikasi Prezidenti sovrini uchun “Sun’iy intellekt yo‘nalishida eng yaxshi startap” (President AI Award) tanlovi tashkil etiladi.
Bu tashabbus yoshlarni ilmiy-ijodiy faoliyatga jalb qilish, innovatsion g‘oyalarni qo‘llab-quvvatlash va yoshlar salohiyatini ro‘yobga chiqarishga qaratilgan.
Shuningdek, davlat organlari va davlat ishtirokidagi korxonalarning raqamli transformatsiya darajasi baholanganda, sun’iy intellekt texnologiyalarini joriy etish ko‘rsatkichlari ham inobatga olinadi.
Eng yaxshi AI loyihalar uchun milliy reyting
2026-yil 1-martdan boshlab yiliga ikki marotaba “Sun’iy intellekt bo‘yicha eng yaxshi loyiha” tanlovi o‘tkaziladi. Bu reyting vazirlik va idoralar o‘rtasida sog‘lom raqobat muhitini yaratib, eng samarali AI yechimlarini ilgari surishga xizmat qiladi.
Prezident Farmoni — O‘zbekistonning sun’iy intellekt sohasida jahon tendensiyalariga hamqadam bo‘lish va milliy raqamli iqtisodiyotni yangi bosqichga olib chiqish yo‘lidagi muhim huquqiy qadamdir. Ushbu tashabbuslar natijasida innovatsiyaga asoslangan iqtisodiyot, zamonaviy ta’lim tizimi va ilmiy-texnologik infratuzilma shakllanadi.
