O‘zbekiston Respublikasi Prezidenti yoshlar tadbirkorligini rivojlantirishga qaratilgan yangi tashabbusni e’lon qildi. Unga ko‘ra, “Aloqabank” yoshlarning biznes loyihalari va startaplarini qo‘llab-quvvatlovchi “Yoshlar banki”ga aylantiriladi va bu maqsadlar uchun 200 million dollar ajratildi.
Asosiy imkoniyatlar:
Mikroqarzlar: O‘zini o‘zi band qilgan yoshlar ishlab chiqarish, qishloq xo‘jaligi, servis, fan, san’at va sport yo‘nalishidagi loyihalari uchun 7 yil muddatga 100 million so‘mgacha imtiyozli mikroqarz olishi mumkin.
Kreditlar: Kamida 20 nafar yoshni ish bilan ta’minlagan va kichik korxona yoki o‘quv markazi tashkil etgan tadbirkorlarga 7 yil muddatga 5 milliard so‘mgacha imtiyozli kreditlar beriladi.
Xotin-qizlar tadbirkorligi: Bank kreditlarining kamida 30 foizi xotin-qizlar tadbirkorligini qo‘llab-quvvatlashga yo‘naltiriladi.
Innovatsion loyihalar: “Innovatsion yoshlar” loyihasi doirasida venchur jamg‘armalar orqali yoshlarning ilmiy-tadqiqot va texnologik ishlanmalari moliyalashtiriladi.
Biznes inkubatorlar va startap garajlar:
“Aloqabank” huzurida “Yoshlar biznes inkubatori” va uning hududiy markazlari tashkil etiladi. Bu inkubatorlar yoshlarning startaplarini 6 oydan 3 yilgacha qo‘llab-quvvatlab, ularni tayyor biznesga aylantirishga ko‘maklashadi.
Shuningdek, “Startap garaj”tomonidan o’z rezidentlariga 10 ming dollargacha investitsiya ajratiladi
Keyingi bosqichlarda “Aloqa Venchur” jamg‘armasi startaplarga investitsiya ajratilib, mahsulot va xizmatlarini ichki va xalqaro bozorlarda sotish, biznes hamkorlar topish va qo‘shimcha investitsiyalar jalb qilishga ko‘maklashadi.
Yangi loyihalar va ish o‘rinlari:
2 mingga yaqin yosh tadbirkorni qo‘llab-quvvatlash hamda yangi startaplar sonini 200 ga yetkazish rejalashtirilgan.
Keyingi 2 yil ichida 350 ming yosh loyiha va tashabbuslarga jalb qilinib, 100 mingta yuqori daromadli ish o‘rinlari yaratiladi.
Bundan tashqari, 1 apreldan boshlab har oyda “loyihalar kunlari” tashkil etilib, eng ilg‘or biznes g‘oyalari tanlab boriladi. Viloyatlarda bo‘sh turgan davlat obyektlari yoshlar uchun biznes inkubator markazlari sifatida ajratiladi.
Ushbu tashabbus O‘zbekistonda startap ekotizimini rivojlantirish va yosh tadbirkorlarga katta imkoniyatlar yaratishga qaratilgan.
