O‘zbekiston IT bozorida yangi avlod mutaxassislari shakllanmoqda. Ular nafaqat mahalliy loyihalarda, balki global platformalarda ham o‘z so‘zini aytishga ulgurmoqda. Dasturiy muhandis, texnik yozuvchi va mentor Dildoraxon Ganiyeva ana shunday kadrlar sirasiga kiradi. Uning faoliyati o‘zbekistonlik mutaxassislar uchun geografik chegaralar shartli ekanligini isbotlab kelmoqda.
Bugungi kunda Dildoraxon dunyo bo‘ylab millionlab foydalanuvchilarga ega bo‘lgan ochiq kodli hamkorlik dasturlarini ishlab chiquvchi ONLYOFFICE kompaniyasida masofadan turib faoliyat yuritmoqda. U SDK hujjatlari va sun’iy intellektga asoslangan funksiyalarni ishlab chiqishda ishtirok etib, foydalanuvchilarning ish samaradorligini oshirishga hissa qo‘shmoqda.
Dildoraxon mahalliy mutaxassislar jahon miqyosida raqobatbardosh bo‘la olishining isbotidir. Uning Yevropa va AQShdagi institutlarga xizmat qiluvchi xalqaro standartdagi ishlari, professionallik uchun geografik chegaralar mavjud emasligini ko‘rsatib turibdi.
Professional tajribasini fundamental bilimlar bilan mustahkamlash maqsadida Dildoraxon 2025-yilda Janubiy Kaliforniya Universiteti (USC) magistraturasiga qabul qilindi. Mazkur universitet «Data Science» (Ma’lumotlar ilmi) va sun’iy intellekt tadqiqotlari bo‘yicha dunyoning yetakchi markazlaridan biri hisoblanadi.
Uning maqsadi aniq: mashinasozlik va ma’lumotlarga asoslangan innovatsiyalarni chuqur o‘rganib, bu bilimlarni O‘zbekistonda real muammolarni hal qilishga yo‘naltirish.
«Mening maqsadim — O‘zbekistonning raqamli infratuzilmasini, xususan, sug‘urta va davlat xizmatlari sohalarini takomillashtirishga yordam beradigan texnologik yechimlarni olib kirishdir. Texnologiya insonlar hayotini yanada shaffof, samarali va adolatli qilishi kerak», — deydi Dildoraxon.
IT sohasida ayollar: Yutuqlar va to‘siqlar
IT Park Uzbekistan’ning 2023-yilgi hisobotiga ko‘ra, mamlakat texnologiya sohasidagi mutaxassislarning atigi 17 foizini ayollar tashkil etadi. Madaniy stereotiplar va texnik ta’lim olishdagi cheklovlar hali ham dolzarb muammo bo‘lib qolmoqda. Biroq, «Startup Garage» tomonidan tashkil etilgan SG Women kabi dasturlar vaziyatni o‘zgartirishga xizmat qilmoqda.
«Sohaga endi kirib kelganimda, o‘rnak oladigan ayol liderlar barmoq bilan sanarli edi. Hozir esa o‘zim yosh qizlar uchun o‘sha vaqtda menga yetishmagan ustoz bo‘lishga, ularga IT sohasida ham yetakchilik qilish mumkinligini amalda ko‘rsatishga intilyapman, – deydi u.
2022-yilda Dildoraxon Tumaris.Tech inkubatsiya dasturida ishtirok etdi. Uning jamoasi yaratgan, oziq-ovqat isrofgarchiligini kamaytirishga qaratilgan «Tidbit» startapi ijtimoiy ahamiyati sababli mentorlar e’tirofiga sazovor bo‘ldi. Microsoft Developers Community (MDC) platformasida faol bo‘lib, talabalar va dasturchilar uchun bilim almashish muhitini yaratishga hissa qo‘shmoqda.
Hozirda Dildoraxon nufuzli Outtalent dasturi a’zosi. U
«Men shunchaki daromad uchun chet elga ketmayapman. Asosiy maqsadim — xorij tajribasini O‘zbekistonga olib kelish va qizlarga texnologiya sohasida o‘z o‘rnini topishga ko‘maklashish», — deydi mutaxassis.
