“O‘zbekiston – 2030” strategiyasida mamlakatimizni mintaqadagi “IT-HUB” markaziga aylantirish maqsadi belgilangan. Ushbu maqsadga erishish uchun raqamli texnologiyalar bosqichma-bosqich rivojlantirilmoqda. Barcha hududlarda IT-parklar tashkil qilinib, bu sohada o‘qish va ishlash imkoniyatlari kengaymoqda. Internetning tezligi va qamrovi oshirilgan bo‘lib, 190 mingdan ortiq aholi yangi ish o‘rinlari bilan ta’minlandi.
So‘nggi yillarda ushbu sohaga 3 milliard dollarlik investitsiyalar jalb qilingan. Xorijiy kapital ishtirokidagi korxonalar soni 2017-yilga nisbatan 8,5 barobar oshgan bo‘lib, hozirda ularning soni mingdan oshdi. Bugungi kunda soha xodimlarining har o‘n nafaridan biri xalqaro kompaniyada faoliyat olib bormoqda. Agar yetti yil avval atigi 12 ta eksportchi korxona bo‘lgan bo‘lsa, bu yil ularning soni 650 taga yetgan. Yil oxiriga kelib axborot texnologiyalari va aloqa xizmatlari eksporti 900 million dollardan oshishi kutilmoqda.
Turli sohalarda sun’iy intellektdan foydalanish jadal rivojlanmoqda. Ushbu texnologiya asosida 20 dan ortiq loyiha amalga oshirilib, yirik tarmoq va korxonalar uchun yana 70 ga yaqin loyiha ishlab chiqildi. Xalqaro reytinglarda O‘zbekiston sun’iy intellektga tayyorgarlik ko‘rsatkichlari bo‘yicha 17 pog‘onaga yuqoriladi.
Shu yilning 14-oktabrida Prezident tomonidan qabul qilingan qaror asosida, 2030-yilgacha sun’iy intellekt texnologiyalarini rivojlantirish strategiyasi tasdiqlandi. Ushbu strategiyada sun’iy intellektga asoslangan dasturiy mahsulotlar va xizmatlar hajmini oshirish, texnik infratuzilmani kengaytirish, kadrlar salohiyatini yuksaltirish kabi muhim maqsadlar belgilandi.
Taqdimotda Raqamli texnologiyalar vaziri kelgusi yilga mo‘ljallangan rejalar yuzasidan ma’lumot berdi.
Xususan, Buxoro, Farg‘ona va Toshkent viloyatlarida “bulutli” ma’lumotlar markazlarini ishga tushirish rejalashtirilgan. Startaplarga yordam ko‘rsatish maqsadida Toshkent axborot texnologiyalari va Inha universitetlarida sun’iy intellekt laboratoriyalari tashkil etiladi. Shuningdek, davlat idoralarining 3 mingga yaqin xodimi, hokimlar va ularning o‘rinbosarlari bu yo‘nalishda malaka oshiradi.
Mutasaddilarga sun’iy intellektga asoslangan loyihalar sonini 100 taga yetkazish, dasturiy mahsulotlar va xizmatlar hajmini 50 million dollarga oshirish vazifasi qo‘yildi.
Tarmoq korxonalarida amalga oshirilgan transformatsiya yaxshi natija bermoqda. Shu yilning o‘zida telekommunikatsiya xizmatlari hajmi 16 foizga o‘sib, 21 trillion so‘mni tashkil etdi. “Uztelecom” kompaniyasining daromadi esa 9 trillion so‘mdan oshgan.
Kelgusi yilda boshqaruv jarayonlarini to‘liq raqamlashish, xarajatlarni optimallashtirish, ekologik, ijtimoiy va korporativ boshqaruv tamoyillarini joriy etib, xalqaro reytingda o‘z o‘rniga ega bo‘lish muhimligi qayd etildi.
“O‘zbekiston pochtasi” tizimida ham sezilarli o‘zgarishlar amalga oshirilmoqda. Bu yil pochta xizmatlaridan tushgan daromad 1,4 barobar oshdi, eksport ko‘rsatkichlari esa 20 foizga ko‘paydi. Yangi xizmat turlari joriy qilingani sababli pochta jo‘natmalari hajmi 50 foizga oshdi.
Rejaga ko‘ra, kelasi yilda 1 600 ta pochta bo‘limida elektron tijorat mahsulotlarini yetkazib berish tizimi joriy etiladi. Raqamli saralash markazi tashkil qilinib, elektron tovarlar va pochta jo‘natmalarini qayta ishlash sifatini oshirish ko‘zda tutilgan. Ushbu loyihalarni amalga oshirish uchun Yevropa tiklanish va taraqqiyot bankidan mablag‘lar jalb qilinadi.
Soha rivoji uchun muhim qadam sifatida Telekommunikatsiyalar to‘g‘risidagi qonunning yangi tahriri qabul qilindi. Endilikda ushbu qonun asosida barcha tarmoq va hududlar kesimida ikki yillik raqamlashish dasturi ishlab chiqilishi rejalashtirilgan.
Kelgusi yilda 6 mingta yangi tayanch stansiya qurilishi, 30 ming kilometr optik tolali kabellar tortilishi va internet qamrovini 98 foizga yetkazish maqsad qilib qo‘yildi. Shuningdek, soha eksport hajmini 1,2 milliard dollarga oshirish bo‘yicha chora-tadbirlar amalga oshiriladi.
Davlat rahbari tashabbusi bilan tashkil etilayotgan Raqamli texnologiyalar xalqaro markazi haqidagi qonunning ishlab chiqilishi ushbu soha rivojiga yangi bosqich ochadi. “Enterprise Uzbekistan” deb nomlangan mazkur markazda “ingliz huquqi” tamoyillari, kapitalning erkin harakati, xalqaro standartdagi mehnat munosabatlari va xorijiy bank filiallari faoliyatini yo‘lga qo‘yish ko‘zda tutilgan.
Taqdimot davomida sun’iy intellektga oid qonuniy asoslarni yaratish hamda raqamli texnologiyalar sohasida ta’limni rivojlantirish bo‘yicha tegishli ko‘rsatmalar berildi.
