Hukumat yig‘ilishidan so‘ng, Adliya vaziri Erlan Sarsembayev, adliya vazirining o‘rinbosarlari Botagoz Jaksalekova va Bekbolat Moldabekov ishtirokida matbuot anjumani o‘tkazildi.
Brifing davomida Erlan Sarsembayev qozog‘istonlik foydalanuvchilar bir necha oydan beri Instagram’da mahalliy ijrochilarning musiqalaridan foydalana olmayotganini qayd etdi. Unga ko‘ra, bu holat Qozog‘iston mualliflik huquqlari jamiyati KazAK va Meta kompaniyasi o‘rtasidagi shartnoma muddati tugagani sabab yuzaga kelgan.
Vazirning so‘zlariga ko‘ra, bu masala mualliflik huquqi egalarining platformalar bilan imzolagan shartnomalariga bog‘liq. Hozirda mualliflik huquqlarini boshqaruvchi istalgan tashkilot Instagram va Meta kabi platformalar bilan shartnomalar tuzishi mumkin. O‘tgan yilning kuzida bunday kelishuvlardan biri tomonlarning biri tashabbusi bilan bekor qilingan. Hozirda mamlakatdagi 15 ta shunday tashkilotdan biri Meta bilan yangi bitim bo‘yicha muzokaralar olib bormoqda. Adliya vazirligi esa ushbu jarayonni huquqiy jihatdan tartibga solish uchun harakat qilmoqda.
Bundan tashqari, vazirlik mualliflarga o‘z asarlaridan foydalanish jarayonini nazorat qilish imkonini beruvchi raqamli platforma yaratish ustida ish olib bormoqda. Ushbu tizim mualliflik huquqlarining buzilishining oldini olishga yordam berishi kutilmoqda.
Erlan Sarsembayev shuningdek, mamlakatda ijro hujjatlarini elektron ijro tizimi orqali yanada soddalashtirish davom ettirilishini ma’lum qildi. Shu asosda, robot orqali undirib olinadigan mablag‘ miqdorini 20 oylik hisob-kitob ko‘rsatkichidan 50 oylik hisob-kitob ko‘rsatkichigacha oshirish rejalashtirilmoqda. Bu esa fuqarolarning vaqt va mablag‘larini tejashga yordam beradi.
