Ilon Maskning SpaceX kompaniyasi AI dasturlash vositasi Cursor’ni ishlab chiquvchi Anysphere kompaniyasini $60 milliard dollarga sotib olishini rasman e’lon qildi. Kelishuv SpaceX tarixidagi eng yirik xaridga aylandi va kompaniyaning sun’iy intellekt poygasidagi ambitsiyalarini yangi bosqichga olib chiqmoqda.
Cursor so‘nggi ikki yil ichida dasturchilar orasida eng tez o‘sayotgan AI mahsulotlardan biriga aylandi. 2022-yilda MIT bitiruvchilari tomonidan asos solingan startap AI yordamida kod yozish va tahrirlash imkoniyatlari bilan millionlab foydalanuvchilarni jalb qildi. Kompaniya yillik takrorlanuvchi daromadini (ARR) $4 milliard dollardan oshirishga muvaffaq bo‘lgan.
Aslida, bu bitimning poydevori aprel oyida qo‘yilgan edi. O‘shanda SpaceX va Cursor strategik hamkorlikni boshlagan, SpaceX esa kompaniyani keyinchalik $60 milliard dollarga sotib olish huquqini qo‘lga kiritgan edi. Muqobil variant sifatida esa xarid amalga oshmasa, Cursor bilan qo‘shma ishlanmalar uchun 10 milliard dollar to‘lash mexanizmi belgilangan edi.
Bitimning asosiy maqsadi — SpaceX’ning AI ekotizimini kuchaytirish. Xususan, Cursor texnologiyalari va jamoasi Grok modelini rivojlantirishda muhim rol o‘ynashi kutilmoqda. Bozor kuzatuvchilarining fikricha, Cursor’ning dasturchilar orasidagi ommabopligi va katta hajmdagi kod ma’lumotlari SpaceX’ga OpenAI Codex hamda Anthropic’ning Claude Code mahsulotlariga qarshi kuchli pozitsiya yaratishga yordam beradi.
Bitim to‘liq aksiyalar orqali amalga oshiriladi va 2026-yilning uchinchi choragida yakunlanishi kutilmoqda. Xarid e’lon qilinganidan so‘ng SpaceX aksiyalari yana o‘sishni davom ettirdi, kompaniyaning bozor qiymati esa $2,5 trillion dollardan oshdi.
AI sanoatida bugungi kunda eng qimmat aktiv model emas, balki dasturchilar har kuni foydalanayotgan mahsulotga aylangan platformalardir. Cursor’ning SpaceX tarkibiga qo‘shilishi aynan shuni tasdiqlaydi: AI poygasining navbatdagi bosqichi laboratoriyalarda emas, balki dasturchilar ishlayotgan muhitlarda kechmoqda.
2024-yilda yunikorn bo’lgan Cursor 2025-yilda Koala startapini sotib olgan edi.
