Bir necha kun avval Pivot.uz o’zbekistonlik tadbirkor Beknazar (Bek) Abdikamalov asos solgan Speko startupining dunyodagi eng nufuzli akseleratorlardan biri — Y Combinator Summer 2026 dasturiga qabul qilingani haqida xabar bergan edi. Endilikda startup o’zining ilk mahsulotini rasman taqdim etdi.
Speko — bu voice AI infratuzilmasi uchun yaratilgan «OpenRouter for Voice» platformasi. U speech-to-text (STT), katta til modellari (LLM) va text-to-speech (TTS) xizmatlari orasidan ayni vazifa va til uchun eng samarali kombinatsiyani avtomatik tanlaydi.
Startup asoschisi Beknazar Abdikamalovning aytishicha, voice agent yaratishda eng katta muammo modellarni tanlash emas, balki ularni doimiy ravishda qayta baholab borishdir. AI bozori juda tez o’zgarayotgani sababli, bir necha hafta oldin eng yaxshi hisoblangan model tez orada o’z o’rnini boshqasiga bo’shatishi mumkin.
Shu sababli Speko turli voice modellarini uzluksiz benchmark qilib boradi va ularni:
- Word Error Rate (WER);
- latency;
- Time to First Token (TTFT);
- ishlash narxi (cost per minute)
kabi ko’rsatkichlar asosida baholaydi. Natijalarga qarab platforma foydalanuvchi so’rovlarini avtomatik ravishda eng yaxshi model yoki model kombinatsiyasiga yo’naltiradi. Benchmark natijalari yangilanganda esa routing ham avtomatik o’zgaradi va dasturchilar kodni qayta yozishiga hojat qolmaydi.
Speko o’z benchmark natijalarini ham ochiq e’lon qilmoqda. Bu esa developerlarga turli AI voice modellarining samaradorligini real vaqtga yaqin ko’rish va taqqoslash imkonini beradi.
Y Combinator tomonidan qo’llab-quvvatlanayotgan Speko hozirda San-Fransiskoda faoliyat yuritmoqda va voice AI infratuzilmasini soddalashtirishni maqsad qilgan.
Voice AI bozori tobora raqobatbardosh bo’lib bormoqda. Har hafta yangi STT, LLM va TTS modellari paydo bo’layotgan bir paytda, ularni qo’lda sinab ko’rish vaqt va resurs talab qiladi. Speko esa bu jarayonni avtomatlashtirib, kompaniyalarga har doim eng optimal AI stack’dan foydalanish imkonini beradi. Bu nafaqat xarajatlarni kamaytiradi, balki voice agentlar sifatini ham sezilarli darajada oshirishi mumkin.
