O’zbekiston startap ekotizimining so’nggi ikki oyidagi eng yuqori profilli voqeasi o’z yakuniga yetdi. «School 21» innovatsion ta’lim markazida Startup Garage akseleratorining «Grand Demo Day» tadbiri bo’lib o’tdi. Dasturga ariza topshirgan 200 ta startapdan faqat eng kuchli 9 tasi yakuniy saralashdan o’tib, pitch qilish imkoniyatiga ega bo’ldi — va raqamlar o’zi gapiradi: bitta kechada $95,000 miqdorida soft commitment imzolandi.
Ikki oylik intensiv dastur — mentorlik sessiyalari, pitch treninglari va mahsulotni sinash bosqichlaridan iborat — startaplarga nafaqat g’oyani, balki biznes-modelni ham sayqallash imkonini berdi. Demo Day kuni ular natijalarini venchur fondlari, biznes-angellar va soha ekspertlari oldida himoya qilishdi.
Eng yirik investitsiyani — $50,000 — Safora (saforatravel.com) qo’lga kiritdi. Startap mehmonxonalar uchun bulutli PMS tizimi va AI-concierge yordamchisini o’z ichiga olgan yagona ekotizim platformasini taklif etadi. Mehmonlar xona buyurtmasi, taksi, restoran va valyuta ayirboshlashni bitta ilova orqali amalga oshiradi; mehmonxona esa SaaS obuna va komissiya daromadlarini oladi.
$25,000 ni Savat (savat.app) jalb qildi — 300 dan ortiq O’zbekiston e-commerce platformasini bitta interfeysa jamlovchi AI shopping aggregator. Narxlar tarixini kuzatish, chegirma bildirinomalari va marketplace integratsiyasi uning asosiy ustunligi.
$20,000 bilan RentZor (rentzor.uz) uchinchi o’rinda. O’zbekistondagi ilk P2P ijara marketplace — MyID verifikatsiyasi va raqamli shartnomalar asosida jihozlar, texnikalar va boshqa buyumlarni ijaraga berish/olish platformasi. Har bir bitimdan ikki tomonlama 10% komissiya modeli.
Bu yakuniy kelishuv emas, balki investorning aniq qiziqishini bildiruvchi dastlabki qadam. Due Diligence bosqichidan so’ng rasmiy raundga o’tadi. Lekin bugungi ekotizim uchun bu signal o’zi ahamiyatli: uchta mahalliy startap bir kuni ichida jami $95,000 jalb qildi. Tadbir School 21, Asaxiy.uz, Bellissimo Pizza, Hambi va Pivot hamkorligida o’tdi.
