2025-yil 25-sentabr kuni Toshkent shahrida “Ayollar & Sun’iy intellekt: Ilhomlantir. O‘qit. Joriy et” nomli forum bo‘lib o‘tdi. Unda texnologiya va sun’iy intellekt sohasida faoliyat yuritayotgan ayol yetakchilar, tadqiqotchilar hamda tadbirkorlar ishtirok etdi.
Tadbir ICT Week 2025 doirasida GAP Women IT Union va IT Ladies loyihalari, IT-ta’lim assotsiatsiyasi ko‘magida tashkil etilib, ayollarni axborot texnologiyalari sohasida qo‘llab-quvvatlashga qaratildi. Forum bilim almashish, muvaffaqiyatli tajribalarni taqdim etish va sun’iy intellektning karyera, ta’lim hamda biznesga ta’sirini muhokama qilish uchun muhim maydon bo‘ldi. Ishtirokchilar qo‘llab-quvvatlash dasturlari haqida ma’lumot berib, qizlarni raqamli sohada faol bo‘lishga undovchi hikoyalar bilan o‘rtoqlashdi.
Forumning asosiy ma’ruzachilari qatorida O‘zbekiston Respublikasi Raqamli texnologiyalar vazirligi maslahatchisi Kamola Sobirova, Women in Tech® Global (Fransiya) asoschisi va bosh direktori Ayumi Mor Aoki, Digital Advice Consulting (BAE) bosh direktori Shayma Kurz hamda O‘zbekiston va Markaziy Osiyodan taniqli ekspertlar ishtirok etdi.
“Bu forum nafaqat texnologiyalar, balki ular orqali kelajakni o‘zgartirayotgan insonlar haqida. Maqsadimiz – ayollarning IT sohasidagi ulkan salohiyatini namoyish etish va ular uchun keng imkoniyatlar yaratishdir”, – dedi Kamola Sobirova, Raqamli texnologiyalar vaziri maslahatchisi.
Forum ilhomlantiruvchi yakun bilan nihoyasiga yetdi – unda ayollarning texnologiyalar olamidagi yo‘li va ularning raqamli kelajakdagi o‘rnini aks ettirgan “Woman’s path” videoloyihasi premyerasi taqdim etildi.
Tadbirning ahamiyati
GAP Women IT Union va IT Ladies tashabbuslari “Digital Uzbekistan – 2030” strategiyasini amalga oshirishda muhim o‘rin tutadi. Mazkur forum raqamli tenglikni ta’minlash bo‘yicha global harakatning bir bo‘lagi bo‘lib, O‘zbekistonning sun’iy intellekt va raqamli innovatsiyalar sohasidagi xalqaro ekspertlar hamjamiyati bilan hamkorligini yanada mustahkamladi.
So‘nggi yillarda mamlakatda sezilarli yutuqlar qayd etildi. 2018-yilda oliy ta’lim muassasalarida axborot-kommunikatsiya texnologiyalari yo‘nalishida taxminan 3 300 nafar qiz tahsil olgan bo‘lsa, 2024-yilga kelib bu ko‘rsatkich 17 700 nafardan oshdi. GAP loyihasi esa atigi ikki yil ichida butun respublika bo‘ylab mingdan ortiq ishtirokchini qamrab olib, ularning ko‘pchiligi yetakchi kompaniyalarda ish boshladi yoki amaliyot o‘tamoqda.
Shu bilan birga, O‘zbekiston xalqaro reytinglarda o‘z mavqeini mustahkamladi: BMTning elektron hukumat indeksida 87-o‘rindan 63-o‘ringa ko‘tarildi, shuningdek, Global Startup Ecosystem Index’da ham ko‘rsatkichlarini yaxshiladi. Bu natijalar IT-mutaxassislarga bo‘lgan talabning ortib borayotganini tasdiqlaydi hamda ayollarning texnologiya sohasida faol ishtirokini ta’minlashning strategik ahamiyatini ko‘rsatadi.
