Bir kuni bozorda o‘g‘lim bilan navbatda turarkanmiz, u zerikib: «Ona, Uzum Marketdan buyurtma bersangiz bo‘lardi-ku, navbatda turishga hojat yo‘q,» deb qoldi. Avvaliga ishonmadim, bozordan oladigan mahsulotlarni yetkazib berishlari mumkinligini tasavvur ham qilmagandim. Lekin uyga yetiboq sinab ko‘rdik: meva-cheva, non, hatto uy-ro‘zg‘or buyumlarini ham tez va sifatli yetkazib berishdi. O‘shanda angladimki, bu xizmat nafaqat vaqtni tejaydi, balki turmushimizni ham ancha qulaylashtiradi. Ha, Uzum Market hayotimizning muhim bir qismiga aylanib bormoqda.
Kompaniya qanday yaraldi?
Uzum Market 2022-yil 1-dekabrda o‘z faoliyatini boshladi va qisqa fursatda O‘zbekistonda elektron tijorat sohasining yetakchilaridan biriga aylandi. Asoschilari Jasur Jumayev va Boris Dobrodeev bo‘lib, ular innovatsion g‘oyalar va ilg‘or texnologiyalarni birlashtirib, bozorga yangi yondashuv olib kirishni maqsad qildilar. Jasur Jumayev, Rossiyada mashhur «Vkontakte» kompaniyasining sobiq rahbari va «KupiKupon» kompaniyasining hammuassisi bo‘lib, o‘z tajribasini O‘zbekistonda muvaffaqiyatli tatbiq etishga qaror qildi. Uning strategik yondashuvi Uzum Marketni qisqa vaqt ichida kuchli raqobatchiga aylantirdi.
Boris Dobrodeev esa Rossiyaning mashhur «VK» kompaniyasining sobiq bosh direktori bo‘lib, hozirda Uzum Marketda maslahatchi sifatida faoliyat yuritadi. Ularning birlashgan kuchi Uzum Marketni nafaqat O‘zbekistonda, balki butun Markaziy Osiyo bozorida ham mustahkamlashga yordam berdi. Texnologiyalarni rivojlantirish, tezkor yetkazib berish tizimlari va mijozlarga yuqori sifatli xizmatlarni taqdim etish orqali Uzum Market ishonchli va barqaror brendga aylandi. Shu tariqa, kompaniya nafaqat savdo, balki raqamli xizmatlar orqali ham o‘z muvaffaqiyat yo‘lini yaratdi.
Brend nomi nima ma’noni anglatadi?
Uzum Market nomi shunchaki brend emas, balki yurtimizning boy tarixi, qadriyatlari va milliy merosini aks ettiradi. Uzum qadimdan o‘zbek xonadonlarida farovonlik va muhabbat ramzi bo‘lib kelgan.
Nomning tanlanishi, brend asoschilarining milliy qadriyatlarni hurmat qilishini va iste’molchilar uchun eng qulay xizmatlarni taqdim etishga intilishini anglatadi. Uzum Market sifatli mahsulotlari, tezkor yetkazib berish tizimi va mijozlarga e’tibor bilan bozorda o‘z o‘rnini mustahkamladi. Bu muvaffaqiyatning asosiy omili esa, albatta, brend nomining milliy ruh bilan uyg‘unligidir.
Uzum Market va raqobatchilar
Uzum Market – O‘zbekistondagi eng yirik marketpleyslardan biri bo‘lib, elektron tijorat, fintech va bank xizmatlarini o‘z ichiga olgan ekotizimni yaratgan. Bugungi kunda Uzum Market elektron tijorat bozorining 70 foizidan ortig‘ini egallagan bo‘lib, eng yaqin raqobatchisidan 11 baravar katta hajmda ishlamoqda.
Uzum Market xalqaro raqobatchilari orasida Rossiyaning Ozon va Wildberries platformalari hamda Xitoyning Temu servisi mavjud. Ozon va Wildberries O‘zbekistonga yetkazib berish xizmatlarini taklif qilgani bois, mahalliy bozor uchun jiddiy raqobat vujudga kelmoqda.
Uzum Marketning eng katta afzalliklaridan biri – uning ishonchli logistika tizimi. Foydalanuvchilar maxsus chegirmalar va aksiyalar orqali xaridlarni yanada foydali amalga oshirish imkoniyatiga ega. Masalan, 2023-yilda Uzum Market mobil ilovasi 13,5 million martadan ortiq yuklab olingan bo‘lib, bu O‘zbekistonda Telegram va Instagram’dan keyin eng ommabop ilovalardan biri bo‘lishiga sabab bo‘ldi.
Ish o‘rinlari va geografik qamrov
Uzum Market mamlakat iqtisodiyotiga ham katta hissa qo‘shmoqda. Hozirgi kunda kompaniyada 10 mingga yaqin xodim ishlaydi, ularning 1000 nafari dasturiy mahsulotlarni ishlab chiqish va qo‘llab-quvvatlash bilan shug‘ullanadi.
2024-yil davomida kompaniyaning buyurtmalarni yetkazib berish punktlari soni 934 taga yetdi. Bu punktlarning katta qismi aholisi 30 ming nafardan kam bo‘lgan hududlarda joylashgan bo‘lib, yangi ish o‘rinlarini yaratishga ham xizmat qilmoqda. Masalan, yangi ochilgan topshirish punktlarining 27 foizi 30 ming kishigacha bo‘lgan shaharlar, 15 foizi esa 10 ming kishigacha bo‘lgan qishloq va tumanlarda joylashgan.
Uzum Market qisqa vaqt ichida O‘zbekistonning yetakchi elektron tijorat platformasiga aylandi. Sifat, innovatsiya va mijozlarga e’tibor uning muvaffaqiyat kaliti bo‘lib, kompaniya nafaqat onlayn xaridlarni osonlashtiradi, balki mahalliy iqtisodiyot va ish o‘rinlariga ham katta ta’sir ko‘rsatmoqda. Uzum Market innovatsion echimlar va barqaror rivojlanish strategiyalari orqali kelajakda yanada yuksalishga intilmoqda.
“Eng yaxshi maqola” tanlovining 3-o’rin g‘olibi Azizbek Turdiboyev tayyorlagan
