Milliy venchur kapital fondi UzVC global akselerator Techstars bilan O‘zbekistonga kengaytirilgan Techstars Startup Community Partnership’ni olib kelish bo‘yicha shartnoma imzoladi. Bu mahalliy startap hamjamiyatini faollashtirish va mintaqaviy venchur kapital tizimiga investitsiya qilinadigan kompaniyalar oqimini ko‘paytirishga qaratilgan strategik qadam hisoblanadi.
UzVC va Techstars o‘rtasidagi kelishuv O‘zbekiston venchur kapitali va startap sanoatini rivojlantirishda yangi bosqichni boshlab beradi. Ushbu hamkorlik O‘zbekistonlik tadbirkorlar va startaplarga xalqaro miqyosdagi standartlar, biznesni rivojlantirishning ilg‘or usullari va professional aloqalarning global tarmog‘idan foydalanish imkoniyatini yaratadi.
Hamkorlik nafaqat moliyaviy resurslar, balki ekspertlar yordami, sohaning yetakchi mutaxassislari murabbiyligi va xalqaro bozorlarga chiqishni o‘z ichiga olgan innovatsion tadbirkorlikni qo‘llab-quvvatlash uchun keng qamrovli hamjamiyat yaratishga qaratilgan. Bu hamkorlik startap loyihalarning sifatini va ularning mintaqaviy hamda global miqyosdagi raqobatbardoshligini oshirishga xizmat qiladi.
Tashabbus so‘nggi yillarda butun mamlakat bo‘ylab o‘tkazilgan bir nechta Techstars jamoat dasturlari va Startup Weekend tadbirlariga asoslangan O‘zbekistondagi mavjud Techstars ishtiroki va jamoatchilik faoliyatiga tayanadi. Techstarsning global hamjamiyat dasturlari, jumladan, Startup Weekend 2010-yillarning oxiridan boshlab Markaziy Osiyo va O‘zbekistonda faol bo‘lib, asoschilarga dastlabki g‘oyalarni jamoalar va prototiplarga aylantirishga yordam bergan. Hamkorlik quyidagi tadbirlarni o‘z ichiga oladi: Techstars Community Development Lab, Techstars Startup Digest, Techstars Startup Week va Techstars Startup Weekend.
Hamkorlikning asosiy maqsadlari va kutilayotgan natijalari quyidagilarni o‘z ichiga oladi:
- Yuztagacha asoschi faollashtiriladi
- Targ‘ibot va tadbirlar orqali yuztagacha yangi g‘oyalar yaratiladi;
- 20 tagacha startap kompaniyalar Techstars Global oldindan akseleratsiya dasturlarida ishtirok etadi;
- Mahalliy va xalqaro tarmoqlardan 200 nafardan ortiq mentor jalb qilinadi;
- O‘zbekiston bo‘ylab 15 ta tadbir (uchrashuvlar, xakatonlar, Demo kunlari va mahorat darslari) o‘tkaziladi.
Shuningek ushbu maqsadlar investitsiya kiritishga tayyor startaplar oqimini ko‘paytirish va asoschilarga ilg‘or o‘sish hamda kapital jalb qilish uchun tayyorgarligini oshirishga qaratilgan.
Dasturni amalga oshirish va mahalliy miqyosda yetkazib berish O‘zbekistonning Techstars Startup Weekend hamjamiyati va mahalliy Startup Weekend tashkilotchilaridan tashkil topgan Hackonnect tadbirlar va dasturlar kompaniyasi bilan hamkorlikda olib boriladi. Hackonnect shaharlar bo‘ylab joylarda dasturlash, jamoatchilik bilan aloqalar va murabbiylar faoliyatini muvofiqlashtiradi.
«Ushbu hamkorlik O‘zbekistonning innovatsiyalar yo‘lidagi tarixiy bosqich hisoblanadi. Techstars bilan hamkorlik qilish orqali biz nafaqat mahalliy asoschilarga yordam beramiz, balki o‘zbek startap hamjamiyati va jahon o‘rtasida ko‘prik yaratamiz. Techstars bilan mahalliy startaplarimiz salohiyatini oshirish orqali biz mamlakatimiz chegaralaridan tashqariga chiqib, mintaqaviy va global miqyosda raqobatlasha oladigan sifatli startaplar sonini ko‘paytirishimiz mumkin,» – deydi UzVC bosh direktori Dilshod Hoshimov.
Tashabbus O‘zbekistonning startap hamjamiyatini homiylik, mentorlik va tadbirlarni birgalikda o‘tkazish orqali qo‘llab-quvvatlashga intilayotgan strategik hamkorlar, korporatsiyalar, universitetlar, investorlar guruhlari va xalqaro rivojlanish bo‘yicha hamkorlar uchun ochiqdir. Qiziqqan tashkilotlar hamkorlik imkoniyatlari uchun UzVC yoki Hackonnect bilan bog‘lanishlari mumkin.
Hamkorlar haqida
UzVC – O‘zbekiston venchur kapital bozorini rivojlantirish, mahalliy va xorijiy xususiy venchur kapital fondlarini jalb qilish, mahalliy startaplarni mahalliy va xalqaro investorlar bilan bog‘lash, shuningdek, inkubatsiya va akseleratsiya dasturlarini amalga oshirish maqsadida tashkil etilgan davlat tomonidan qo‘llab-quvvatlanadigan venchur fondidir.
Techstars – dunyodagi yetakchi akselerator va startap hamjamiyati dasturlari operatori bo‘lib, uning hamjamiyat dasturlari (jumladan, Startup Weekend) yuzlab shaharlarda o‘tkazilgan va butun dunyo bo‘ylab minglab asoschilarga yordam bergan.
