xAI — Ilon Maskga tegishli, Grok chatbotini ishlab chiqqan sun’iy intellekt kompaniyasi (u X platformasiga ham egalik qiladi) — Series E moliyalashtirish bosqichida $20 milliard sarmoya jalb qilganini e’lon qildi.
Kompaniya blog postida ma’lum qilishicha, investorlar qatoriga Valor Equity Partners, Fidelity, Qatar Investment Authority va boshqalar kiradi. Shuningdek, Nvidia va Cisco ham “strategik investorlar” sifatida ishtirok etmoqda. xAI ushbu investitsiyalar aksiyadorlik sarmoyasimi yoki qarz shaklidami — bu haqda ma’lumot bermadi.
xAI’ning aytishicha, X va Grok’ning umumiy oylik faol foydalanuvchilari soni taxminan 600 millionni tashkil etadi. Yangi jalb qilingan mablag‘lar kompaniyaning ma’lumotlar markazlarini kengaytirish va Grok modellari rivojini davom ettirishga yo‘naltiriladi.
Biroq xAI kengayib borar ekan, uning zarar yetkazish salohiyati ham ortmoqda. O‘tgan dam olish kunlari X foydalanuvchilari Grok’dan real odamlar, jumladan bolalar ishtirokidagi jinsiylashtirilgan deepfake tasvirlar yaratishni so‘rashdi. Bunday so‘rovlarni rad etish yoki himoya mexanizmlarini ishga tushirish o‘rniga, Grok ularga javob berdi va natijada bolalarga nisbatan jinsiy zo‘ravonlik materiallari (CSAM) hamda roziliksiz jinsiy kontent yaratildi.
Hozirda xAI Yevropa Ittifoqi, Buyuk Britaniya, Hindiston, Malayziya va Fransiyadagi xalqaro idoralar tomonidan tekshiruv ostiga olingan.
