Zingo.uz – bu foydalanuvchiga mos suhbatdosh topish va interaktiv muloqot orqali chet tillarini o‘rganish imkoniyatini taqdim etuvchi innovatsion platforma. Loyiha asoschilari Behzodxo‘ja Nig‘matxo‘jayev va Saidnabi Yo‘ldoshxo‘jayevlar bo‘lib, ular IT sohasida to‘plagan tajribasini ushbu startap orqali amaliyotga tatbiq etmoqda.
Asoschilar
Behzodxo‘ja Nig‘matxo‘jayev 2002-yil Toshkent shahrida tug‘ilgan, yoshligidan informatika faniga qiziqib, turli olimpiadalarda qatnashgan. Maktabni tugatgach, Sharqshunoslik litseyida tahsil olgan va keyinchalik savdo sohasida tajriba orttirgan. 2022-yildan IT sohasiga qiziqib, dasturlashni o‘rganishga kirishgan.
Saidnabi Yo‘ldoshxo‘jayev ham Toshkent shahrida tug‘ilgan va dasturlash sohasida tajriba orttirgan. U Uztelecom kompaniyasida faoliyat yuritgan. 2024-yilda Behzodxo‘ja bilan birgalikda Zingo.uz startapini yaratish maqsadida ish joyidan voz kechgan va loyiha ustida ishlay boshlagan.
G‘oya qanday paydo bo‘ldi?
Zingo.uz 2024-yil yozida asoschilar tomonidan ishlab chiqila boshlagan. Loyiha ingliz tilini o‘rganishda mos suhbatdosh topishdagi qiyinchiliklarni bartaraf etishga qaratilgan. Platformaning asosiy vazifasi foydalanuvchilarni bir-biri bilan bog‘lab, jonli muloqot orqali speaking ko‘nikmalarini rivojlantirishdir.
ICT Week va investitsiya jalb qilish
Zingo.uz startapi O‘zbekistonda o‘tkazilgan ICT Week tadbirida chet ellik investorlarga taqdim etilgan. 17 ta investordan 12 tasi loyiha bilan qiziqib, kontaktini qoldirgan. Tadbir davomida hozirgi investor bilan muzokara olib borilib, dastlab og‘zaki kelishilgan. Keyinchalik rasmiylashtirilgan.
Dastlabki bosqichda startap $50,000 miqdorida investitsiya jalb qilgan bo‘lib, barcha xarajatlar aynan shu mablag‘ hisobidan qoplanmoqda. Loyiha rivojlanishida Startap Garage asoschisi Muhammad Xalil katta yordam ko‘rsatgan, turli qiyinchiliklarni yengishga ko‘maklashgan.
Kelajak rejalari
Zingo.uz test rejimida faoliyat yuritmoqda. Loyiha hozirgacha 150 dan ortiq foydalanuvchi tomonidan sinovdan o‘tkazilgan va ommaga taqdim etilish jarayoni 2024-yilning mart oyida boshlanadi.
Dastlab loyiha Telegram bot ko‘rinishida bo‘lishi rejalashtirilgan edi, ammo keyinchalik mobil dastur ishlab chiqildi. Hozirda ilova Play Market va App Store platformalarida mavjud.
● 2025-yil – O‘zbekiston bozorida to‘liq o‘rin egallash.
● 2026-yil – Global bozorga chiqish va boshqa tillar bilan bog‘liq xizmatlarni ham ishga tushirish (ingliz, rus, arab va boshqa tillar).
● Sun’iy intellekt va VR texnologiyalari – foydalanuvchilar uchun ilg‘or til o‘rganish imkoniyatlari yaratish.
● Venchur fondlar bilan hamkorlik – yirik investitsiyalar jalb qilish va xalqaro bozorda o‘sish.
Biznes modeli va daromad manbalari
Zingo.uz platformasi quyidagi daromad manbalariga ega:
- Obuna tizimi – premium foydalanuvchilari kengroq imkoniyatlarga ega bo‘ladi.
- Video kurslar savdosi – ingliz tilini mustaqil o‘rganish uchun pullik kurslar taqdim etiladi.
O‘zbekiston startap ekotizimida Zingo.uz
O‘zbekistonda startap ekotizimi jadal rivojlanyapti, bunda Startap Garage kabi inkubatorlar muhim rol o‘ynamoqda. Mamlakatimizdagi startaplarning asosiy muammolaridan biri premium xizmatlarga pul to‘lashga tayyor auditoriyaning kamligidir. Shu bois, investitsiya va strategik hamkorliklar orqali platforma rivojlanishi rejalashtirilgan.
Xulosa
Zingo.uz – bu til o‘rganish jarayonini soddalashtirishga qaratilgan ilg‘or startap. Loyiha jamoasi tomonidan ishlab chiqilgan strategiya va istiqbolli rejalar startapni xalqaro miqyosda muvaffaqiyatli platformaga aylanishiga xizmat qilishi kutilmoqda. Zingo.uz qisqa vaqt ichida til o‘rganish sohasida yetakchi loyihalardan biriga aylanishi rejalashtirilmoqda.
Mixaliovna Gulnoza
