O‘zbekiston Markaziy banki va Istiqbolli loyihalar milliy agentligi (NAPP) steyblkoinlardan to‘lov vositasi sifatida foydalanishni pilot loyihalar doirasida sinovdan o‘tkazmoqda. Regulyatorlar parallel ravishda CBDC — markaziy bankning raqamli valyutasini joriy etish imkoniyatlarini ham o‘rganmoqda. Bu haqda 24-avgust kuni Silk Road Finance and Technology Forum’da Markaziy bank raisi o‘rinbosari Nodirbek Achilov ma’lum qildi.
Hozircha sinovlar kichik miqyosda olib borilmoqda. Dastlabki bosqichda chakana tranzaksiyalar litsenziyalangan moliyaviy tashkilotlar orqali amalga oshiriladi. Markaziy bank esa tizimning asosiy mexanizmlarini ishlab chiqish va moliyaviy institutlar o‘rtasidagi hisob-kitoblarni tashkil etish bilan shug‘ullanadi.
Markaziy bank moliyaviy institutlar o‘rtasidagi hisob-kitoblar uchun ulgurji CBDC modelini ham ko‘rib chiqmoqda. Regulyator xalqaro tajribani o‘rganib, CBDC bo‘yicha tahliliy hujjat tayyorlamoqda. Yakuniy qaror tegishli tadqiqotlar va infratuzilma uchun zarur qoidalar ishlab chiqilgach qabul qilinadi.
Shu bilan birga, NAPP obligatsiyalar va aksiyalarni tokenlashtirish bo‘yicha alohida tartibga solish mexanizmlarini ishlab chiqmoqda. Yangi qoidalarda tokenlashtirilgan aktivlarni hisobga olish, to‘lov va kliring jarayonlari, saqlash hamda investorlarning, jumladan aksiyadorlarning ovoz berish va korporativ boshqaruvdagi huquqlarini belgilash ko‘zda tutilmoqda.
