O‘zbekistonda davlat oliy ta’lim tashkilotlari talabalari o‘rtasida “Eng innovatsion g‘oya” respublika tanlovini o‘tkazish tartibi tasdiqlandi. Tanlovning respublika bosqichida eng yaxshi uchta loyiha 500 mln, 300 mln va 200 mln so‘mdan moliyaviy qo‘llab-quvvatlanadi.
Tanlov Vazirlar Mahkamasining 2026-yil 4-sentabrdagi 463-son qarori asosida har yili sentyabrdan dekabrgacha ikki bosqichda o‘tkaziladi. Birinchi bosqich universitetlarda, respublika bosqichi esa Innovatsion rivojlanish agentligi tomonidan tashkil etiladi.
Talabalar o‘z innovatsion g‘oyalarini quyidagi yo‘nalishlardan birida taqdim etishi mumkin:
- sun’iy intellekt va raqamli texnologiyalar;
- fintech;
- AgTech;
- kiberxavfsizlik;
- sog‘liqni saqlash;
- farmatsevtika;
- mudofaa va xavfsizlik;
- energiya samaradorligi;
- suv texnologiyalari;
- fan va ta’lim.
Har bir talaba tanlovda faqat bitta innovatsion g‘oya bilan ishtirok etishi mumkin.
Tanlovning birinchi bosqichida eng yaxshi uchta loyiha mualliflariga jami 100 mln so‘m miqdorida grant ajratiladi:
1-o‘rin — 50 mln so‘m
2-o‘rin — 30 mln so‘m
3-o‘rin — 20 mln so‘m
Mazkur mablag‘lar universitetlarning budjetdan tashqari mablag‘lari hisobidan ajratiladi. Universitet bosqichi g‘oliblari respublika bosqichida ham ishtirok etadi.
Respublika bosqichida eng yaxshi uchta loyiha quyidagi miqdorda moliyalashtiriladi:
1-o‘rin — 500 mln so‘m
2-o‘rin — 300 mln so‘m
3-o‘rin — 200 mln so‘m
Biroq bu mablag‘lar bevosita talabaning shaxsiy hisobiga o‘tkazilmaydi. Pul loyiha muallifi, Innovatsion rivojlanish agentligi va tegishli OTM o‘rtasidagi uch tomonlama kelishuv asosida universitet hisobiga yo‘naltiriladi.
Kelishuvda loyihani amalga oshirish muddati, bajariladigan ishlar hamda mablag‘lardan maqsadli foydalanish tartibi belgilanadi.
Loyihalar qanday baholanadi?
Tanlov ishtirokchilarining loyihalari 100 ballik tizimda beshta mezon asosida baholanadi. Har bir mezon uchun maksimal 20 ball beriladi:
- ilmiy va innovatsion yangiligi;
- g‘oyaning dolzarbligi;
- mavjud analoglardan farqi;
- xarajatlar smetasining asoslanganligi;
- kutilayotgan natijalar.
Respublika bosqichida loyihalarni olimlar, davlat tashkilotlari vakillari va tegishli soha mutaxassislaridan iborat komissiya baholaydi. Hududlardan qatnashuvchi talabalar loyihalarini onlayn tarzda taqdim etishi mumkin.
Respublika bosqichi 20-dekabrgacha yakunlanishi kerak.
Tanlovga qanday hujjat topshirish mumkin?
Tanlovda ishtirok etmoqchi bo‘lgan talabalar o‘zlari tahsil olayotgan davlat OTMiga murojaat qilishi kerak.
OTMlar tanlovning birinchi bosqichiga hujjatlar qabul qilinishi boshlanganini 10-sentyabrdan e’lon qiladi. Talabalar universitetdagi saralash komissiyasi nomiga arizani 10-oktabrgacha topshirishi mumkin.
