28–29-oktabr kunlari dunyoning uchta yirik texnologiya kompaniyasi — Microsoft, Alphabet va Amazon choraklik moliyaviy natijalarini e’lon qiladi. Bu safar investorlarni faqat daromad va foyda ko‘rsatkichlari emas, balki kompaniyalarning sun’iy intellektga sarflayotgan milliardlab dollarlari qanday natija berayotgani ham qiziqtirmoqda.
So‘nggi yillarda Microsoft, Google va Amazon AI infratuzilmasini kengaytirish, ma’lumotlar markazlarini qurish hamda hisoblash quvvatlarini oshirishga katta mablag‘ yo‘naltirmoqda. Bunday investitsiyalar kompaniyalarning kelajakdagi o‘sishi uchun muhim, biroq ular xarajatlarning qachon va qay darajada daromad keltirishi haqidagi savollarni ham kuchaytirmoqda.
Microsoft 28-oktabr kuni choraklik natijalarini e’lon qiladi. Investorlar, ayniqsa, Azure bulutli xizmatining o‘sishi va AI infratuzilmasiga yo‘naltirilayotgan kapital xarajatlarni kuzatadi. Kompaniyaning avvalgi choragida Azure daromadi valyuta kurslari ta’siri hisobga olinmagan holda 39 foizga o‘sgan.
Alphabet ham 28-oktabr kuni hisobot beradi. Google Cloud xizmatining o‘sishi va kompaniyaning AI loyihalariga ajratayotgan mablag‘lari asosiy e’tibor markazida bo‘ladi. Ikkinchi chorakda Google Cloud daromadi 13,6 milliard dollarga yetib, yillik hisobda 32 foizga oshgan.
Amazon esa 29-oktabr kuni moliyaviy natijalarini e’lon qiladi. Investorlar kompaniyaning AWS bulutli biznesi, daromadlar dinamikasi va AI infratuzilmasiga sarflanayotgan mablag‘larini baholaydi. AWS ikkinchi chorakda 30,9 milliard dollar daromad qayd etgan.
28-oktabr kuni AQSh Federal rezerv tizimi ham foiz stavkasi bo‘yicha qarorini e’lon qiladi. Stavkaning o‘zi bilan birga, regulyatorning kelgusi siyosati haqidagi signallari ham bozor kayfiyatiga ta’sir qilishi mumkin. Foiz stavkalari moliyalashtirish qiymatiga ta’sir qilgani sababli, bu masala katta infratuzilmaviy investitsiyalar qilayotgan texnologiya kompaniyalari uchun ham ahamiyatli.
Bu haftadagi hisobotlar AI poygasining yana bir jihatini ko‘rsatishi mumkin: texnologik gigantlar sun’iy intellektga tobora ko‘proq mablag‘ sarflayotgan bir paytda, investorlar bu xarajatlarning real moliyaviy natijalarini ko‘rishni istamoqda.
