Toshkentda Silk Road Finance & Technology Forumning ikkinchi kuni bo‘lib o‘tmoqda. Tadbirda 74 davlatdan 6 mingdan ortiq ishtirokchi va qariyb 200 nafar spiker qatnashmoqda. Ular orasida regulyatorlar, davlat idoralari, xalqaro moliya institutlari va umumiy boshqaruvidagi aktivlari $4 mlrddan ortiq bo‘lgan investorlar bor.
Forumning ikkinchi kunida raqamli valyutalarni amaliyotga joriy etish, transchegaraviy fintech koridorlarini rivojlantirish va Silk Road mintaqasida investitsiyaviy hamkorlikni kengaytirish masalalari muhokama qilinmoqda.
Kun tartibidan Open Banking, stablecoinlar va markaziy bank raqamli valyutalarini (CBDC) tartibga solish, shuningdek, an’anaviy bank tizimidan raqamli moliyaviy ekotizimlarga o‘tish masalalari o‘rin olgan.
Shuningdek, O‘zbekiston regulyatorining yangilangan Regulatory Sandbox 2.0 tizimi, venture capital dasturlari va islomiy moliya sohasidagi qonunchilik tashabbuslari ham muhokama qilinmoqda.
Forumda AI moliya sektorida keng joriy etilayotgan bir paytda kiberxavfsizlik va shaxsiy ma’lumotlarni himoya qilish, shuningdek, xalqaro texnologik startaplarni O‘zbekistonga jalb qilish uchun qulay muhit yaratish masalalariga ham e’tibor qaratilmoqda. Tadbir O‘zbekiston Markaziy banki va Singapurda joylashgan Global Finance & Technology Network (GFTN) hamkorligida tashkil etilgan.
