Qozog‘istonda fuqarolarning kasb tanlashidan boshlab ta’lim olishi, malakasini tasdiqlashi, ishga joylashishi va keyingi professional rivojlanishigacha bo‘lgan jarayonlarni birlashtiradigan yagona raqamli ekotizim yaratiladi.
Bu haqda Qozog‘iston Mehnat va aholini ijtimoiy himoya vaziri Askarbek Ertayev hukumat yig‘ilishida ma’lum qildi. Xabar mamlakat Prezidenti huzuridagi Markaziy kommunikatsiyalar xizmati tomonidan ham tasdiqlangan.
Yangi tizimda professional malakani tan olish jarayoni to‘liq raqamli formatga o‘tkaziladi. Bu malaka markazini akkreditatsiya qilishdan sertifikat olishgacha bo‘lgan bosqichlarni qamrab oladi. Hukumatning fikricha, bu jarayonni yanada shaffof va fuqarolar uchun qulay qilishga yordam beradi. Shuningdek, insonning professional yo‘li yagona tizim orqali kuzatib boriladi:
kasb tanlash → ta’lim → malaka olish → ishga joylashish → professional rivojlanish.
Qozog‘iston mehnat bozorida kelajakda qaysi mutaxassislarga ehtiyoj oshishini aniqlash uchun Big Data va sun’iy intellektdan foydalanishni rejalashtirmoqda. Tizim orqali sohalar va hududlar kesimida kadrlarga bo‘lgan talabni aniqroq prognoz qilish ko‘zda tutilgan. Shu ma’lumotlar asosida davlatning ta’lim buyurtmasini ham real mehnat bozori ehtiyojiga moslashtirish rejalashtirilmoqda.
Bu yondashuvning asosiy maqsadi — faqat mavjud ma’lumotlarni yig‘ish emas, balki ulardan kelajakdagi kadrlar ehtiyojini oldindan aniqlash va davlat qarorlarini qabul qilishda foydalanish.
Qozog‘istonda bu yo‘nalishdagi ayrim texnologiyalar allaqachon sinovdan o‘tkazilmoqda. Digital Employment Service loyihasi 2026-yil iyulida Pavlodar viloyatida ishga tushirilgan.
Sun’iy intellekt fuqarolarga mos vakansiyalarni aniqlaydi, shuningdek, zarur bo‘lsa, o‘qish, qayta tayyorlanish va boshqa hududga ko‘chib ishlash variantlarini ham taklif qiladi. Iyul oyida tizim orqali 39 mingta SMS yuborilgan va 962 kishi ishga joylashgan. Xizmatni yil oxirigacha Qozog‘istonning barcha 20 hududiga kengaytirish rejalashtirilgan.
Nogironligi bo‘lgan fuqarolar ham qamrab olinadi
Yangi ekotizimda inklyuziv bandlikka ham alohida e’tibor qaratiladi. Nogironligi bo‘lgan fuqarolar uchun kasbga yo‘naltirish va ta’limdan boshlab ishga joylashish hamda ish joyida moslashishgacha bo‘lgan yagona hamrohlik tizimi yaratiladi.
Shu bilan birga, Qozog‘iston qisqa muddatli kasbiy ta’lim tashkilotlarining yagona reyestrini ham yaratishni rejalashtirmoqda. U 2027-yilning birinchi choragida Career Enbek platformasida ishga tushirilishi va undagi ta’lim dasturlari uchun yagona sifat talablari joriy etilishi kutilmoqda.
