AQShning Ecology Mir Group kompaniyasi Samarqand viloyatining Oqdaryo tumanida ma’lumotlarni qayta ishlash markazi — data-markaz qurish imkoniyatini o‘rganmoqda. Loyiha Silk Grid deb nomlangan.
Samarqand viloyati hokimi Adiz Boboyev kompaniya vakillari bilan uchrashib, loyihani amalga oshirish masalalarini muhokama qildi. Uchrashuv yakunida viloyat hokimligi va Ecology Mir Group o‘rtasida Silk Grid loyihasini amalga oshirish bo‘yicha o‘zaro anglashuv memorandumi imzolandi.
Hozirda loyiha uchun zarur shart-sharoitlarni baholash rejalashtirilgan. Jumladan, elektr energiyasi va suv ta’minoti, aloqa infratuzilmasi hamda axborot xavfsizligi talablari o‘rganiladi. Shuningdek, loyihaning dastlabki texnik-iqtisodiy asoslarini tayyorlash, investitsiya hajmi va moliyalashtirish manbalarini aniqlash, yer ajratish masalalari ham muhokama qilingan.
Tomonlar loyihani ilgari surish uchun mas’ul vakillarni tayinlash va tegishli tashkilotlar bilan hamkorlik yo‘l xaritasini ishlab chiqishga kelishib oldi.
Hozircha loyiha uchun rejalashtirilgan investitsiya miqdori, qurilish boshlanishi va markazning ishga tushirilish sanasi ochiqlanmagan. Imzolangan memorandum loyihani amalga oshirish bo‘yicha dastlabki kelishuv bo‘lib, qurilish ishlari boshlanganini anglatmaydi.
