Hippocratic AI startapi bemorlar bilan ishlashda diagnostik bo‘lmagan vazifalarni bajarishga mo‘ljallangan sun’iy intellekt yechimlarini yaratish bilan shug‘ullanadi. Yaqinda kompaniya 1,64 milliard dollar qiymatga baholangan holda B seriyasida $141 million miqdorida katta investitsiya jalb qildi.
Mazkur moliyalashtirish joriy yil ichida uchinchi bosqich bo‘lib, avvalroq kompaniya General Catalyst va Andreessen Horowitzdan $53 million, Nvidia kompaniyasidan esa $17 million olgan edi. Shuni ta’kidlash joizki, Hippocratic AI ikki yildan kam vaqt davomida faoliyat yuritmoqda.
Ko‘plab sog‘liqni saqlash sohasidagi generativ sun’iy intellekt kompaniyalaridan farqli o‘laroq, Hippocratic AI asosan ma’muriy ishlarni yengillashtirishdan ko‘ra, tibbiy mutaxassislar yetishmasligi muammosini hal qilishga qaratilgan. Startap, masalan, operatsiyadan oldingi jarayonlarni amalga oshirish, bemorlarni masofadan nazorat qilish va tibbiy qabulga tayyorlash kabi oddiy vazifalarni bajaradigan agentlarni ishlab chiqmoqda.
2024 yilda kompaniya 23 ta tibbiy tizim va sug‘urta kompaniyalari bilan shartnomalar imzoladi. Jalb qilingan mablag‘lar mahsulotni yangi bozorlar, jumladan, xalqaro bozorlarga kengaytirishga yo‘naltiriladi.
