2025-yil 13-yanvarda Prezident tomonidan № ZRU–1017 «Kosmik faoliyat to‘g‘risida»gi Qonun imzolandi. Ushbu qonun kosmik faoliyatning asosiy jihatlarini, jumladan, maqsadlar, tamoyillar, davlat siyosati yo‘nalishlari va mas’ul organlarning vakolatlarini tartibga soladi.
Kosmik faoliyatni amalga oshirishning asosiy maqsadlari:
- Mamlakatning barqaror ijtimoiy-iqtisodiy rivojlanishini ta’minlash, mudofaa qobiliyati va xavfsizligini mustahkamlashga ko‘maklashish;
- Yer, kosmik makon va osmon jismlarini o‘rganish hamda ular haqidagi ilmiy bilimlarni boyitish va rivojlantirish;
- Kosmik texnologiyalar yordamida sohalarni raqamlashtirishni jadallashtirish;
- Ilmiy, ijtimoiy-iqtisodiy, ekologik, tijorat va boshqa sohalar manfaatlari uchun mamlakat hududini kosmik texnologiyalar yordamida tadqiq etish;
- Kosmik faoliyat bo‘yicha xizmatlar ko‘rsatish va boshqa vazifalarni bajarish.
Kosmik faoliyat bo‘yicha vakolatli davlat organi
Raqamli texnologiyalar vazirligi huzuridagi Kosmik tadqiqotlar va texnologiyalar agentligi («O‘zbekkosmos») kosmik faoliyat sohasida maxsus vakolatli davlat organi hisoblanadi.
Qonunda belgilangan vazifalar va vakolatlar
- Vazirlar Mahkamasi, «O‘zbekkosmos» agentligi, Raqamli texnologiyalar vazirligi va Mudofaa vazirligining kosmik faoliyat sohasidagi vazifalari va vakolatlari;
- Kosmosni ilmiy tadqiq qilish, masofadan zondlash, aloqa va navigatsiya uchun sun’iy yo‘ldoshlarni qo‘llash;
- Kosmik raketa majmualaridan foydalanish, kosmik obyektlarni belgilash va utilizatsiya qilish tartibi.
Asosiy tamoyillar
Kosmik faoliyat insonlar salomatligini himoya qilish, atrof-muhitni muhofaza qilish va jismoniy yoki yuridik shaxslarning mulkini asrashni ta’minlash asosida amalga oshiriladi.
Yerning yuzasi, kosmik makon va undagi barcha obyektlar, shuningdek, tabiiy va texnogen hodisalar kosmik monitoring obyektlari sifatida belgilangan.
Kosmik xizmatlarga bo‘lgan ehtiyoj
Har yili 20-iyulgacha vazirlik va idoralar vakolatli organga kelgusi yil uchun kosmik xizmatlarga, jumladan, kosmik monitoringga bo‘lgan ehtiyoj, hajm, davriylik va muddatlar haqidagi ma’lumotlarni taqdim etadi.
Ushbu qonun mamlakatda kosmik texnologiyalarni joriy etish va rivojlantirish uchun muhim asos bo‘lib xizmat qiladi.
