2026-yil O’zbekiston startap ekotizimi uchun davlat tomonidan qo’llab-quvvatlashning yangi bosqichini boshladi. 1-iyulda Raqamli texnologiyalar vazirligining Kongress zalida bo’lib o’tgan «Powering the Startup Ecosystem» tadbirida IT Park Uzbekistan ikkita dasturni birdaniga taqdim etdi: uch yil davomida faoliyat yuritayotgan President Tech Awardning kengaytirilgan mavsumi va mutlaqo yangi — President AI Award. Ikkalasi birgalikda mamlakat startaplari uchun jami $6 million mablag’ni ochadi.
President Tech Award
President Tech Award 2023-yildan beri O’zbekistonning asosiy texnologik tanlovi hisoblanadi. 2026-yilgi mavsumda uning mukofot jamg’armasi $1 milliondan $5 millionga oshirildi — bu qaror Prezident Shavkat Mirziyoyev tomonidan 24-fevral kuni Kuksaroy rezidensiyasida bo’lib o’tgan yoshlar bilan ochiq muloqot chog’ida e’lon qilingan edi.
Yangi tuzilma ikki qatlamli: $1 million grant shaklida (qaytarilmaydigan), $4 million esa venchur investitsiya sifatida beriladi. Tanlov endi uchta yo’nalishni qamrab oladi:
- Incubation — erta bosqich jamoalar uchun, 2–5 kishilik tarkib, product-market fitga erishish va xalqaro mentorlik olishga qaratilgan
- Acceleration — o’sish bosqichidagi startaplar uchun, 3–8 kishilik tarkib, $1.5 million investitsiya uchun kurashadi
- Best Startup Project — 10 texnologik sektor bo’yicha, IT Park Ventures’dan $2.5 million investitsiya, xalqaro hakamlar hay’ati tomonidan tanlanadi
So’nggi mavsumda 6,000dan ortiq ishtirokchi va 862 jamoa qatnashgan — bu oldingi yildagidan deyarli ikki barobar ko’p. 2023-yildan buyon 13,000dan ortiq ishtirokchi ariza topshirgan, ~1,800 jamoa shakllangan, 45 g’olib loyiha esa 400dan ortiq ish o’rni yaratib, $10 milliondan ortiq keyingi investitsiya jalb qilgan.
President AI Award
Agar Tech Award — umumiy texnologik tanlov bo’lsa, President AI Award — O’zbekistonning sun’iy intellekt yo’nalishiga to’liq bag’ishlangan birinchi davlat tanlovi. Uning nizomi Vazirlar Mahkamasining 2026-yil 5-iyundagi 288-son qarori bilan tasdiqlangan.
Tuzilma Tech Award’ga o’xshaydi, lekin kichikroq miqyosda: umumiy mukofot jamg’armasi $1 million, uchta yo’nalish — Eng yaxshi startap, Akseleratsiya va Inkubatsiya. G’oliblar IT Park Ventures tomonidan ulush evaziga investitsiya oladi:
- 1-o’rin — $100,000
- 2-o’rin — $60,000
- 3-o’rin — $40,000
Mablag’ ajratish mexanizmi ham boshqacha: pul bir martada emas, ikki bosqichda beriladi — yarmi shartnoma imzolangach, qolgan qismi esa bir yil ichida kelishilgan KPI ko’rsatkichlari bajarilishiga qarab. Bu venchur fondlariga xos milestone-based moliyalashtirish yondashuvi — davlat tanlovi uchun O’zbekistonda birinchi marta qo’llanilmoqda.
Ariza topshirish uchun jamoa 3–8 kishidan iborat bo’lishi, a’zolar O’zbekiston fuqarosi yoki mamlakatda yashash guvohnomasiga ega bo’lishi kerak. Talab qilinadigan materiallar ham boshqa davlat grantlaridan farqli — bu safar sof g’oya emas, tayyor MVP kutiladi:
- MVP
- 3 daqiqalik video-pitch
- GitHub repozitoriyiga havola — ekspertlar kodni ko’rib chiqadi
- PDF pitch deck va loyiha logotipi
Barcha materiallar o’zbek, rus va ingliz tillarida tayyorlanishi shart — bu talab dastur boshidanoq xalqaro hakamlar ishtirokini nazarda tutayotganidan dalolat beradi.
| President Tech Award | President AI Award | |
|---|---|---|
| Fond | $5 million | $1 million |
| Yo’nalish | Barcha tech sektorlar | Faqat AI |
| Moliyalashtirish | Grant + venchur investitsiya | Ulush evaziga investitsiya, 2 bosqichda |
| Jamoa hajmi | 2–5 / 3–8 (yo’nalishga qarab) | 3–8 |
| Kod tekshiruvi | Talab etilmaydi | GitHub repozitoriyi majburiy |
Amaliy jihatdan bu shuni anglatadi: agar startap AI’ga asoslangan bo’lsa va allaqachon tayyor MVP’ga ega bo’lsa, President AI Award — kichikroq, lekin ixtisoslashgan va kod darajasida tekshiriladigan dastur. Agar loyiha kengroq texnologik yo’nalishda bo’lsa yoki hali erta bosqichda (faqat g’oya darajasida) bo’lsa, Tech Award’ning Incubation yo’nalishi ko’proq mos keladi.
So’nggi oylarda davlat AI va IT ta’limiga ajratilayotgan grant kvotalarini 35 foizga oshirdi, IT Park esa Uzum va boshqa yirik kompaniyalarning yangi investitsiya davrlarini kuzatib bormoqda. Endi bu zanjirga yana bir bo’g’in qo’shildi: ta’limda kadrlar tayyorlash, keyin esa ularning startaplariga davlat darajasida moliyaviy yo’l ochish.
Ikkala tanlov uchun ham ro’yxatdan o’tish va ariza topshirish awards.gov.uz platformasi orqali amalga oshiriladi.
