Tasavvur qiling, uyingizga professional tozalovchi keladi. Xizmat mutlaqo bepul. Biroq bitta shart bor — u boshiga o‘rnatilgan kamera orqali idish yuvish, chang artish, buyumlarni joyiga qo‘yish va boshqa barcha harakatlarini videoga yozib boradi.
AQShning Nyu-York shahrida ish boshlagan Shift startapi aynan shunday xizmatni taklif qilmoqda. Kompaniya foydalanuvchilarga bepul uy tozalash xizmatini ko‘rsatadi, evaziga esa tozalash jarayonida yig‘ilgan videolardan sun’iy intellekt va kelajakdagi uy robotlarini o‘qitish uchun foydalanadi.
Bugungi AI modellari asosan matn va rasmlar asosida o‘qitilgan bo‘lsa, ertangi humanoid robotlar kundalik hayotdagi vazifalarni ham bajara olishi kerak. Idish yuvish, stol artish, kiyim taxlash yoki buyumlarni tartibga keltirish kabi oddiy ko‘rinadigan ishlar robotlar uchun hali ham murakkab vazifalardan biri hisoblanadi. Shift esa aynan shu harakatlarni real hayotdan yig‘ib, ularni robototexnika kompaniyalari uchun qimmatli ma’lumotga aylantirmoqda. Kompaniya bu g‘oyani quyidagicha izohlaydi:
«Siz toza uyni olasiz. Biz esa robotlarni o‘qitish uchun ma’lumot olamiz.»
Shift ma’lumotlariga ko‘ra, yozib olingan videolar qayta ishlanadi, yuzlar va shaxsiy ma’lumotlar xiralashtiriladi hamda anonimlashtiriladi. Shundan so‘ng ular AI va robototexnika modellarini o‘qitishda qo‘llaniladi. Kompaniya ushbu ma’lumotlardan reklama maqsadlarida foydalanmasligini ta’kidlaydi.
Bu loyiha sun’iy intellekt rivojlanishidagi yangi bosqichni ham ko‘rsatmoqda. Endilikda AI kompaniyalari faqat internetdagi matn va rasmlar emas, balki insonlarning real hayotdagi harakatlarini ham yig‘ishga kirishmoqda. Chunki kelajakdagi humanoid robotlar uyni tozalash, ovqat tayyorlash yoki boshqa maishiy vazifalarni bajarishni aynan shunday ma’lumotlar orqali o‘rganadi.
Shift allaqachon bir nechta mamlakatlarda shunday ma’lumotlarni yig‘ishni boshlagan va kelajakda xizmat geografiyasini yanada kengaytirishni rejalashtirmoqda.
