Termiz, qadimda Buyuk Ipak yo‘lining muhim nuqtalaridan biri bo‘lib, savdo, madaniyat va ilm-fan rivojiga katta hissa qo‘shgan. Bugungi kunda esa shahar O‘zbekistonning janubiy darvozasi sifatida texnologiya va innovatsiya sari yangi taraqqiyot bosqichiga kirib bormoqda.
18-yanvar kuni Termizda Startup Garage’ning yangi filiali tantanali ravishda ochildi. Tadbirda 100 ga yaqin ishtirokchi, jumladan, soha mutaxassislari, startapchilar va tadbirkorlar ishtirok etdi.
Tadbir haqida
Ochilish marosimi davomida quyidagilar bo‘lib o‘tdi:
- Zingo va Dialix AI loyihalari taqdimoti, ularning muvaffaqiyatli ishlash tajribalari namoyish etildi.
- Startup Garage tomonidan Surxondaryo viloyatidagi startaplarni qo‘llab-quvvatlash imkoniyatlari haqida batafsil ma’lumot berildi.
- AloqaVentures vakillari investitsiya jalb qilish imkoniyatlari va hamkorlik shartlari haqida ma’ruza qildi.
- Yangi startapchilar uchun pitch sessiya tashkil qilindi.
- Tadbir ishtirokchilari o‘rtasida tajriba almashinuvi va networking faol o‘tkazildi.
Surxondaryo startaplari uchun yangi bosqich
Startup Garage endi Surxondaryo viloyatidagi har bir startapni qo‘llab-quvvatlaydi. Startap yaratishni istagan har bir tadbirkor Termizdagi filialga murojaat qilishi va innovatsion markazning zamonaviy imkoniyatlaridan foydalanishi mumkin.
Maqsadimiz – yosh startapchilarning g‘oyalarini global maydonga olib chiqish va hududdagi tadbirkorlik ekotizimini mustahkamlashdir.
