Birlashgan Arab Amirliklarida joylashgan fintech kompaniya Fuze o‘zining $12,2 million dollar miqdoridagi Series A investitsiyasini muvaffaqiyatli yakunlaganini e’lon qildi. Investitsiya raundiga Galaxy va e& capital yetakchilik qilgan, shuningdek, Further Ventures ham unda ishtirok etgan. Ushbu investitsiya raundi bilan Fuze jami moliyalashtirish miqdorini $26 million dollardan oshirdi. Kompaniya 2023-yilda boshlang‘ich bosqichda $14 million dollar investitsiya olgan edi.
2023-yilda Mo Ali Yusuf, Arpit Mehta va Srijan Shetti tomonidan tashkil etilgan Fuze, MENA va Turkiya mintaqasidagi moliyaviy institutlar va korxonalarga raqamli aktivlar bilan ishlash infratuzilmasini taqdim etadi. Tashkil topganidan beri kompaniya orqali 2 milliard dollardan ortiq raqamli aktivlar aylanmasi amalga oshirilgan.
Fuze xizmatlari tarkibiga Digital Assets-as-a-Service, OTC savdo platformasi hamda yaqinda ishga tushirilgan stablecoin infratuzilmasi mahsulotlari kiradi. Kompaniya shuningdek, FuzePay orqali to‘lov sohasiga ham kirib kelgan bo‘lib, yaqinda BAA Markaziy Bankidan chakana to‘lov va kartochka tizimlari uchun litsenziyani qo‘lga kiritdi.
Yangi investitsiya mablag‘lari kompaniyaning mintaqaviy va global miqyosda kengayishiga, mahsulotlarni rivojlantirish va muvofiqlikni kuchaytirishga, hamda yangi xodimlarni jalb qilishga xizmat qiladi. Fuze o‘zini kripto va stablecoin yechimlarini qonuniy asosda taqdim etuvchi yetakchi kompaniya sifatida namoyon qilishni maqsad qilgan.
Fuze hammuassisi va bosh direktori Mo Ali Yusuf ta’kidlashicha: “Galaxy’ning raqamli aktivlar borasidagi tajribasi va e&’ning keng tarmog‘i bizga banklar, fintechlar va an’anaviy korxonalarni raqamli aktivlar bilan ishlashga olib kirishda muhim turtki beradi. Kelgusi 12 oy ichida har bir moliyaviy institut va biznes bu texnologiyadan foydalanishni boshlaydi deb hisoblaymiz.”
Galaxy Europe bosh direktori Leon Marshall esa: “BAA raqamli aktivlar uchun aniq tartibga solish mexanizmlarini ishlab chiqmoqda, bu esa mintaqani global innovatsiya markaziga aylantirish imkonini beradi. Fuze ushbu sohada tez rivojlanayotgan kompaniya sifatida e’tiborimizni tortdi,” dedi.
Fuze tashkil topganidan buyon Abu-Dabida joylashgan, ADQ tomonidan qo‘llab-quvvatlanadigan Further Ventures tomonidan ham moliyaviy jihatdan qo‘llab-quvvatlab kelinmoqda. Ushbu fondning boshqaruvchi hamkori Mohamed Hamdy Fuze’ni global miqyosda raqamli aktivlar sohasidagi yetakchilardan biri bo‘lishiga ishonadi.
Shuningdek, global texnologiya guruhi e& ning investitsiya bo‘limi e& capital vakili Harrison Lung kompaniya portfellarida Fuze bilan “tabiiy sinergiya” mavjudligini, xususan e& money, Wio va Careem Pay kabi platformalar bilan hamkorlik qilish imkoniyatlari keng ekanligini qayd etdi.
