Ijtimoiy tarmoq Bluesky endi “muhim va ishonchli” deb topilgan foydalanuvchilarga rasmiy verifikatsiya olish imkonini taklif qilmoqda. Verifikatsiyaga ariza topshirish uchun yangi onlayn forma ishga tushirildi.
Shuningdek, tashkilotlar ham “Trusted Verifier” (Ishonchli tasdiqlovchi) maqomini olishlari mumkin. Bu ularga boshqalarning hisoblarini tasdiqlash imkonini beradi. Ushbu funksiya ilgari New York Times, Wired va The Athletic kabi nufuzli tashkilotlar bilan sinovdan o‘tkazilgan edi.
Bluesky Twitter’dagi kabi faqat “ko‘k belgi”ga tayanmaydi. Unda foydalanuvchilar o‘z domenlari (masalan, @npr.org) orqali o‘zlarini mustaqil tasdiqlash imkoniga ega. Bugungi kungacha 270,000 dan ortiq akkaunt ushbu domen-verifikatsiyani qo‘llagan.
Verifikatsiyaga ariza beruvchilar faol, to‘liq to‘ldirilgan (bio, rasm, xavfsizlik sozlamalari) akkauntga ega bo‘lishi kerak. Ular haqiqiy shaxs, ro‘yxatdan o‘tgan biznes yoki tashkilot bo‘lishi, va rasmiy veb-saytga havola taqdim etishlari talab qilinadi.
Biroq “notable” hisoblar nima asosida tanlanishi aniq emas. Bluesky bu masalada professional tan olinishi, media yorituvlari, nufuzli ma’lumot manbalaridagi mavjudlik kabi ko‘rsatkichlarni inobatga olishini aytgan. Har bir ariza individual baholanadi, va kompaniya faqat tanlangan foydalanuvchilarga javob qaytaradi.
Ayni vaqtda, markazlashmagan yondashuvga ega bo‘lgan Deer.Social kabi Bluesky alternativ platformalar ham mavjud. U yerda foydalanuvchilar kimga ishonishlarini o‘zlari belgilab, o‘zaro verifikatsiya qilish imkoniga ega.
