AloqaVentures o‘z portfelidagi startap – Cradle Vision Tech dunyo miqyosida nufuzli hisoblangan Plug and Play Batch 4 akseleratsiya dasturiga hamda NVIDIA Inceptiondasturiga qabul qilindi.
Plug and Play – innovatsion startaplarni qo‘llab-quvvatlab, ularni yetakchi investorlar, korporatsiyalar va mentorlar bilan bog‘lovchi global platforma sanaladi. Cradle Vision Tech’ning ushbu platformaga qabul qilinishi kompaniyani jahon miqyosida e’tirof etilgan, yuqori salohiyatli startaplar safiga qo‘shadi.
Shuningdek, Cradle Vision Tech’ning NVIDIA Inception dasturiga qabul qilinishi ham katta ahamiyatga ega. Dastur sun’iy intellektga ixtisoslashgan startaplarning rivojini tezlashtirishga qaratilgan bo‘lib, Cradle Vision Tech endilikda NVIDIA’ning ilg‘or texnologiyalari, ekspert yordami, maxsus treninglari hamda global bozorga chiqish imkoniyatlaridan foydalana oladi. Bu esa kompaniyaning sun’iy intellekt asosidagi kuzatuv va analitik yechimlarini yanada kuchaytiradi hamda global miqyosda o‘sishini tezlashtiradi.
Ma’lumot o‘rnida: 2023-yil Toshkentda asos solingan Cradle Vision Tech qisqa vaqt ichida kuchli natijalarga erishdi: kompaniya tez sur’atlar bilan daromadini oshirmoqda va bank, chakana savdo, ta’lim hamda davlat sektoridagi yirik mijozlarga xizmat ko‘rsatmoqda. Bugungi kunga kelib, ularning yechimlari har oyda 2 milliondan ortiq mijozni tahlil qilib, 95–98 foiz aniqlik darajasida natijalar bermoqda
Cradle Vision Tech’ning raqobatchilardan asosiy ustunligi – yuqori aniqlikdagi yuzni tanib olish, real vaqtli tahlilva kengaytiriladigan kuzatuv texnologiyalariga asoslangan muhandislik yondashuvidir. Kompaniya hozirda Markaziy Osiyo va MENA mintaqasi bozorlariga chiqish bo‘yicha aniq strategiyaga ega bo‘lib, bu esa uni dunyo miqyosda kengaytirib, sarmoyadorlar uchun yuqori daromad keltiruvchi biznesga aylantiradi.
AloqaVentures yuqori salohiyatli va innovatsion loyihalarni qo‘llab-quvvatlashda davom etadi.
