Dunyodagi eng boy insonlardan biri, Microsoft asoschisi Bill Geyts o‘z farzandlariga boyligining faqat ozgina qismini qoldirishga qaror qildi. U hind podkasteri Raj Shamani bilan suhbatda farzandlarining har biri uning umumiy boyligining 1 foizidan kamrog‘ini olishini ma’lum qildi.
- “Farzandlarim a’lo darajada tarbiya va ta’lim olishdi, biroq ular mening boyligimning atigi 1 foizidan kamrog‘ini olishadi. Men bu ularga foyda keltirmasligiga ishonch hosil qildim. Bu sulola emas. Men ulardan Microsoft’ni boshqarishni talab qilmayman,” — dedi Geyts.
Forbes nashriga ko‘ra, Bill Geytsning boyligi hozirda 108 milliard dollarga baholanmoqda. Geyts bu mablag‘larning katta qismini qimmatli qog‘ozlar va boshqa aktivlarga sarmoya qilgan. Ularning qiymati esa bozordagi o‘zgarishlarga qarab farq qilishi mumkin va har doim ham naqd pul ko‘rinishida emas.
Shunday bo‘lsa-da, agar har bir farzand taxminan 1 milliard dollar olsa, bu ham Geyts boyligining 1 foizidan kamrog‘ini tashkil etadi. Microsoft asoschisining uch nafar farzandi — Jennifer (28 yosh), Rory (25 yosh) va Phoebe (22 yosh) — voyaga yetgan.
- Bill Geytsning ta’kidlashicha, u farzandlariga o‘z yo‘llarini mustaqil ravishda topish imkoniyatini bermoqchi.
- “Men ularning o‘z muvaffaqiyatlari va daromadlariga erishishlarini xohlayman. Ular mening g‘ayritabiiy omadim va boyligim soyasida qolib ketishlarini istamayman,” — dedi u.
Ma’lumki, Geyts va uning sobiq rafiqasi Melinda birgalikda AQShdagi eng yirik xayriya jamg‘armalaridan biri — Bill & Melinda Gates Foundation’ni tashkil etishgan. Ular o‘z boyliklarining katta qismini jamg‘arma orqali xayriya va ijtimoiy loyihalarga yo‘naltirib kelishmoqda.
Avvalroq Bill Geyts sun’iy intellektning kelajagi haqida ham fikr bildirgan edi. Uning so‘zlariga ko‘ra, keyingi o‘n yil ichida sun’iy intellekt shifokorlar va o‘qituvchilarning ishini qisman almashtirishi mumkin. Geyts bu texnologiyalar tibbiy xizmat ko‘rsatish, tashxis qo‘yish hamda virtual repetitorlar va yordamchilar orqali ta’lim sohasida katta o‘zgarishlar olib kelishini ta’kidlagan.
Fikr bildirish