8-may kuni Toshkent shahar iqtisodiy sudi O‘zbektelekomning Humans’ga qarshi da’vosini qanoatlantirdi — xizmatlar uchun 520 mlrd so‘mdan ortiq qarzdorlikni undirish bo‘yicha qaror chiqardi. Humans bu qaror ustidan apellyatsiya berdi.
Qarzdorlik tafsilotlari:
- Asosiy qarz: 497 mlrd so‘m
- Penya: 23,5 mlrd so‘m (dastlab 223 mlrd so‘m so‘ralgan)
- Jami: 520 mlrd so‘mdan ortiq
Sud qarori ortidan Humans’ning xalqaro investori — Humans Mobile Ltd. (Singapur) Jahon banki huzuridagi ICSID arbitraj sudida O‘zbekistonga qarshi da’vo arizasi berdi. Arbitraj ishi hozirda “ko‘rib chiqilmoqda” (ICSID Case No. ARB/25/24).
Da’vo O‘zbekiston va Singapur o‘rtasidagi investitsiyalarni himoya qilish bitimi asosida berilgan. Humans davlat organlarining harakatlari biznesga zarar yetkazganini ta’kidlamoqda.
Maroqand to‘lov tashkilotiga qo‘yilgan cheklovlar ham bu nizoga sabab bo‘lgan:
- 2024-yil sentabrda Markaziy bank UPay brendini vaqtincha chekladi.
- 2024-yil oktabrda litsenziya to‘xtatildi.
- 2025-yil mart oyida ayrim cheklovlar olib tashlandi.
Humans’ning bayonoti:
“Biz qonun ustuvorligi va oshkoralik tarafdorimiz. Arbitraj — tadbirkorlar huquqlarini insofsiz ma’muriyatchilikdan himoya qilishning madaniy yo‘lidir”, — dedi Humans Group asoschisi Vladimir Dobrinin.
O‘zbektelekomning javobi:
- Humans o‘z tarmog‘ini qurmagan, balki O‘zbektelekom infratuzilmasidan foydalanib kelmoqda.
- Kompaniya xizmatlar uchun to‘lovni tizimli ravishda kechiktirib kelgan.
- O‘zbektelekom monopol mavqe orqali bosim o‘tkazayotganini inkor etdi.
Kompaniya agar yolg‘on yoki chalg‘ituvchi axborotlar tarqatilsa, sudga murojaat qilish huquqini o‘zida saqlab qolganini ham qo‘shimcha qilgan.
